Los actos oficiales del Día de la Muyer son en Mieres

L'actu institucional del Gobiernu asturianu nel Día Internacional de la muyer 2005 va facese a les 5 d'esta tarde nel Campus Universitariu de Mieres. Presentáu pola periodista asturiana de CNN Plus Marta Reyero, l'actu va contar cola participación de "muyeres significatives pa la construcción de la igualdá n'Asturies" ente les que tan la cantante de tonada Diamantina Rodríguez, (Quirós, 1919) Medalla d'Asturies nel añu 2002 y responsable del caltenimientu d'esti xéneru musical . La periodista Nuria Valera, (Mieres, 1967) ye otra d'estes muyeres representatives gracies a los sos reportaxes sobre la muyer y les sos realidaes nun ámbitu local y tamién nos conflictos bélicos de Yugoslavia Rusia, Ucrania o l'Iraq. Nuria ye tamién autora del llibru "Íbamos a ser reinas" nel que fai un analís del fenómenu de la violencia doméstico.

La escritora Berta Piñán, (Cañu, Cangues d'Onís, 1963) conocida pola so obra n'asturianu y ganadora del Premiu de poesía Teodoro Cuesta, ye otra de les muyeres que van participar nel actu, lo mesmo que la profesora de filoloxía Socorro Suárez-Lafuente, promotora y coordinadora del Doctoráu d'Estudios de la Muyer y Fundadora del Seminariu de Estudios de la Muyer de la Universidá d'Uviéu.

La llista de muyeres participantes nel actu remata cola presencia de Dolores Montes, médica d'atención primaria nel Infiestu y participante en dellos programes del Institutu Asturianu de la Muyer p'aplicar la perspectiva de xéneru a los temes de salú, amás de ser parte del equipu de Formadores de Violencia de Xéneru pa personal sociosanitariu del Principáu.