Los accidentes llaborales baxaron un 6,16% n'Asturies

Según los datos del últimu informe facilitáu pol Institutu Asturianu de Prevención de Riesgos Llaborales, los accidentes llaborales baxaron n'Asturies un 6,16% en términos xenerales hasta'l mes de payares del 2010.

Mientres los once primeros meses del añu 2010 produxéronse un total de 15.603 accidentes de trabayu. Según se recueye nel informe, el númberu d'accidentes rexistraos mientres la xornada de trabayu subió a 14.113, lo que supunxo un 5,70% menos respectu al mesmu periodu del pasáu exerciciu 2009.
  
Nun asocedió los mesmu colos accidentes in-itinere, que subieron nun 1,02%, yá que de los 1.475 accidentes rexistraos nesi periodu de 2009 pasóse a los 1.490 nel 2010.
  
Por grandes sectores d'actividá'l sector servicios (42,21%) sigue contabilizando'l mayor númberu d'accidentes anque cuenta col menor índiz d'incidencia. Otra manera, les industries extractives contabilicen un númberu d'accidentes muncho menor, pero l'índiz ye más eleváu.
  
En términos de gravedá del accidente, el mayor descensu produzse nos accidentes mortales, que tanto en xornada (-17,65%) como in-itínere (-50%) siguen siendo los que más baxen. Asina se rexistraron un total de 14 accidentes mortales y 127 de carácter grave.