L'Orihuela, rival últimu del UP Langreo nel so camín a Segunda B

Nun lo van tener fácil los xugadores d'Hernán Pérez, que van xugar la vuelta en Ganzábal al cruciase con un tercer clasificáu.

Tres dexar fuera al Alondras y al Náxara, l'UP Langreo va tener qu'afrontar un viaxe llargu na eliminatoria decisiva pol ascensu a Segunda División B. L'Orihuela, equipu con 8 temporaes en Segunda B y dos promociones a Segunda (2010-2011 y 2011-2011), foi'l rival que decretó'l sortéu celebráu na tarde d'ayeri en la Ciudad del Fútbol de Las Rozas, l'únicu terceru que quedaba, lo qu'asegura'l factor cancha.

El grupu valencianu ye ún de los más potentes de la Tercera, como amuesa que per delantre del Orihuela finaren el filial del Levante y un históricu como'l Castellón. La mayor parte de la plantiya caltiénse del añu pasáu, destacando la presencia del veteranu Rafita, llateral derechu con esperiencia en Primera col Almería.

Los d'Oriola elimaron na primer eliminatoria al Cristo Atlético –verdugu l'añu pasáu del Avilés, equipu precisamente pendiente del Unión pa caltener la categoría– pol global de 3-1, y al Ceuta nos penaltis tres un doble empate a un gol pese a xugar con 10 na mayor parte del choque de vuelta pola espulsión del centrocampista Fleky, baxa pal partíu del domingu. Ésti va disputase a les 19 hores en Los Arcos, onde va haber, como ye vezu, presencia de l'afición azulgrana.

Semeya propiedá de la Real Federación Española de Fútbol.