L'oriente tien muncho folk

Llanes y Llastres son dos posibilidaes pa ver una nueche folk esti fin de selmana.

Llanes celebra les fiestes de Santa María la Madalena, y nel programa, amás de les clásiques verbenes los díes 21 y 22, tenemos una nueche folk esti sábadu 19. Nestes fiestes los protagonistes son los miembros del bandu de "La Madalena", que paseen la h.oguera pel pueblu colos traxes de porruanos p'acabar quemándola. Los grupos de la nueche folk del sábadu van ser los locales "Niundes", los gallegos "Liorna" y los xixoneses "Felpeyu". El sitiu del conciertu va ser el puertu de Llanes a les 23.00 hores.

Llastres pela so parte celebra los VIII Alcuentros cola Cultura Tradicional d'Asturies, organizaos pol Conceyu de Colunga. Nestos alcuentros hai dende cursos de llingua asturiana, hasta talleres de repostería, pasando por una nueche folk esti sábadu 19. A les 23:00 hores nel quioscu de la música de Llastres van actuar "Corquiéu" de Ribeseya, qu'actua'l mesmu día na Xermandía de Corvera (ver noticia embaxo), y "N'Arba".

Rescampla qu'esti fin de selmana coincidan cuatro conciertos de folk el mesmu día. Salas, Corvera, Llanes y Llastres celebren una nueche folk el sábadu, colo que nun hai escusa esti fin de selmana pa nun dir a ver a un grupu asturianu nel escenariu.