L’observatoriu de Política Llingüística ve nel plan de normalización un progresu “modestu pero oxetivu”

L'observatoriu de la Política Llingüística, ente que se define como grupu con espíritu críticu y al empar constructivu formáu por "persones representatives social, política y culturalmente, preocupaes pol presente y pol futuru de la llingua asturiana", ta acabante de dar la so valoración ofocial sobre'l plan de normalización del asturianu.

Esti observatoriu, del que formen parte ente otros xente como'l sociólogu Francisco Llera Ramo, los escritores Xuan Bello, Adolfo Camilo Díaz o Berta Piñán , el presidente del Conseyu de Comunidaes Asturianes Manuel Fernández de la Cera o la diputada d'IX Noemí Martín, apunta na so valoración que les llinies d'actuación que propón el Plan suponen un progresu modestu pero oxetivu respecto de la realidá precedente, valorando'l fechu de que'l Plan compromete al Gobiernu a executar midíes concretes, con plazos marcaos y asignaciones presupuestaries.

L'Observatoriu diz qu'esti plan nun ye barrera nenguna pa oportunidaes que se produzan nel futuru, y empondera'l calter de documentu frutu d'un consensu políticu que pue valir de base pa futuros consensos de mayor conteníu y meyor afitaos.


Les persones que componen l'observatoriu dicen sentise con "autoridá moral" pa emplazar al Gobiernu a que cumpla'l plan, y destaquen delles directrices del mesmu qu'entienden han de cumplise de manera inmediata, ente elles la oficialización de los topónimos autóctonos, l'apoyu decidíu a la política llingüística municipal entamada por dellos ayuntamientos, l'usu efectivu y visible del asturianu, y del gallego-asturianu na publicidá, comunicación y imaxe corporativa de los organismos del Principáu d'Asturies y l'amparu efectivu al derechu a la enseñanza de la nuestra llingua, evitando los casos de discriminación y ameyorando les condiciones llaborales y pedagóxiques d'esa enseñanza. L'usu efectivu y dignu de la llingua asturiana na futura televisión pública asturiana, dende les primeres emisiones y con un calter claramente normalizador ye otru d'estos oxetivos que la plataforma camienta han de facese efectivos nel plazu más curtiu posible

Finalmente, l'observatoriu diz que "anque'l Plan de Normalización nun llega a les máximes cotes a les que llexítimamente aspiramos, creyemos qu'esta circunstancia nun xustifica n'absoluto la descalificación global del Plan" llamando l'atención sobre'l fechu de que-yos paez "una frivolidá la postura de facer como si nun esistiera y desentendese del impulsu que con él se pue llograr". L'observatoriu camienta nesti sentíu que "en dellos sectores del asturianismu ta implantáu acríticamente un discursu qu'afita como oxetivu únicu y escluyente la oficialidá y que presenta cualquier avance parcial na normalización social como incompatible cola oficialidá futura" Ensin entrar a especificar cualos son esos sectores del asturianismu, l'observatoriu ve qu'ello xenera una "inercia inmovilista y frustrante".

L'Observatoriu da anuncia que no sucesivo va facer un siguimientu del cumplimientu del Plan, ufriendo a les autoridaes y a la opinión pública les sos valoraciones y aportaciones, que van tar feches siempre "con un enfotu constructivu".