L'observatoriu de la Llingua defende la validez del Plan de Normalización

L'observatoriu de la Llingua pronúnciase en términos asemeyaos a como lo fexere cuando'l Plan de Normalización recibió'l preste del Conseyu de Gobiernu, calificándolu de "bona noticia pal lentu y abegosu procesu de recuperación y normalización de la nuesa llingua" El fechu de que'l plan s'aprebare por unanimidá na Xunta Xeneral ye pal Observatoriu "muestra clara de que daqué se ta moviendo na política asturiana no tocante a la cuestión llingüística y de que'l consensu políticu alredor de la normalización social de la llingua tien cada día más posibilidaes efectives"

Darréu d'ello, l'Observatoriu reconoz que'l Plan tien un algame llimitáu nel tiempu, anque ello nun va quitar pa que si se cumple pueda entornar la tendencia anterior hacia'l desaniciu del asturianu, citando la recuperación de la toponimia como'l casu más importante d'esa tendencia. Con too y con ello, pal Observatoriu "resulten comprensibles delles reacciones dende sectores esmolecíos pola llingua d'insatisfacción y rocea énte l'algame llimitáu del Plan" pero ello nun autoriza a "descalificaciones globales" en cuantes que pal Observatoriu "El Plan llega hasta onde foi posible, y eso ye lo qu'anguaño puede dar de sí. Y la única alternativa qu'esiste ye'l non-Plan, ye dicir, la vuelta a la pasividá que caracterizó la última década".

L'observatoriu reconoz que condición d'oficialidá ye "indispensable pa poder avanzar nel camín de la normalización social" y declara darréu d'ello que "la oficialidá del asturianu nun foi posible hasta anguaño porque asina lo quixeron los partíos mayoritarios. Y namás va ser posible cuando se produza un cambiu sustancial na actitú d'estos partíos. Dende esti puntu de vista, resulta ocioso oponer la oficialidá al Plan de Normalización, como si se tratara de cuestiones contradictories".

Sicasí, la busca urxente de soluciones a los problemes que carez l'enseñu del asturianu, tanto no que se refier al avance de la escolarización, en particular nel enseñu secundariu, como sobre too a la normalización y dignificación del profesoráu. Y el garantizar una presencia digna "y non meramente testimonial "del asturianu na radio y televisión autonómiques, apaecen en comunicáu como los mayores esmolecimientos del Observatoriu nesti momentu.

L'Observatoriu de la Política Llingüística defínese como un grupu de persones con representatividá nel mundu de la cultura y políticu d'Asturies, interesaes en que se faigan efectives les posibilidaes reales d'avance qu'agora se dan pa la llingua asturiana, sin rocees y sin demores". L'Observatoriu espresa los sos oxetivos en términos de ser un grupu abiertu que va trabayar "a mou de conseyu asesor de la Oficina de Política Llingüística del Principáu, pero sin vinculación orgánica de nengún tipu, y siempre con un espíritu independiente, críticu y constructivu". ente los sos miembros tan el sociólogu Francisco Llera Ramo, los escritores Xuan Bello y Xandru Fernández o los políticos Noemí Martín y Gonzalo Olmos.