Lo que’l fútbol nun da Salamanca nun lo empresta

Sábese que cuando un equipu cambia d'entrenador suel facelo ganando'l primer partíu, y esi vezu nun falló cola estrena d'Andoni Goikoetxea al frente del Salamanca . Aprovechando la falta de rixu d'un Sporting que taba varáu en campu ensin capacidá nenguna de movimientu, el Salamanca tentó de gana-yos la espalda a los asturianos. Una xugada de gol anulada por orsai y un balón al palu foron los primeros llogrando nel minutu 25 ente Lupidio y Robert fabricar el primer gol pa los locales. El Sporting marchó pal descansu con aquel 1-0 que tanto resquemaba pa les llonxanes opciones asturianes de volver a primera, y asina foi que l'equipu de Xixón salió a la segunda parte a degüellu, siendo Pablo Álvarez, un de los meyores del Sporting na tarde d'ayeri xunta Pablo Lago y Bauzá, l'encargáu de marcar el gol del empate nun remate de cabeza.

Con too y con ello, la poca pólvora que llevaba'l Sporting escosó ehí y anque l'equipu y l'afición apertaron enforma, llevando'l balón tol tiempu, ello nun se convertió en goles. Como siempre, fallaba l'últimu pase, el tiru. Quedaba la opción d'enfotase nel aguante defensivu p'arrampuñar un puntu, pero esi premiu de consolación quedó en nada al caer otra vuelta l'equipu asturianu nuna xugada a balón paráu. Ze Tó, que yá machacare al Sporting en Molinón, aprovechó'l pase d'un compañeru nel saque d'un corner p'afusilar a Roberto. El Sporting tuvo ocasión d'empatar otra vuelta gracies a Juan, pero'l tiru del de Prevera dio nel palu, quemando asina l'últimu cartuchu.