Lo que nunca pasó n'Asturies

La Generalitat de Catalunya mandó trancar ayeri'l grupu II de la central térmica de Sant Adriá del Besós (Barcelona) por un presuntu delitu de contaminación cometíu a primeros d'esti mes. El grupu térmicu, propiedá de Fecsa-Endesa, y con una potencia total de 400 mw, da corriente abondo como pa una población de 300.000 persones, pero tamién lleva dos años afogando a les cases de la rodiada con "lluvia negro" ello ye, partícules de carbón que la central nun llega a quemar y que salen pela chimenea, espardiéndose pela redolada. Como Fecsa - Endesa retrasaba'l pieslle de la planta, el caberu episodiu de lluvia negro protagonizáu pol polémicu Grupu II llevó a los técnicos de la Conseyería de Mediu Ambiente catalana a mandar trancar el grupu. La empresa Fecsa - Endesa, titular del 90% del mercáu catalán d'electricidá, ta estudiando posible recursu a la orden de la Conseyería, pero, arriendes del tema mediuambiental, hai que remembrar que la eléctrica llévase a palos cola Generalitat, siendo esti episodiu otru más nuna riestra d'enfrentamientos bien llarga.Ello ye que n'Asturies hai otra central térmica que lleva tiempu protagonizando episodios bien semeyos de lluvia negro ensin que de momentu se vea traza de que vayan pesllala. L'alcalde de La Ribera yá tien denunciao que'l Grupu I de la central d'Hidroeléctrica de Soto Ribera, con 40 años d'antigüedá, suelta pela chimenea les mesmes partícules de carbón, emporcando tola rodiada cada vez que lu prenden. Si en Cataluña'l Gobiernu acabó trancando la central contaminante, equí la quexa del alcalde parez que quedó pa prau nes instituciones, y tampoco la empresa nun dio anuncia de que vaya pesllar esi grupu, polo menos hasta que terminen la obra del grupu nuevu a gas que van facer al llau.