Lo que costó la Guerra n'Iraq (I)

Cola fin de la Guerra en Iraq los economistes y l´Alministración Bush yá tan faciendo númberos del coste real del conflictu bélicu. Ya en marzu d´esti añu el Senáu norteamericanu, de mayoría republicana, acutare 100.000 millones de dólares pa financiar la invasión n'Iraq. Estes perres sacaríense d´un plan del presidente norteamericanu empobináu a estimular la economía, pero agora que´l conflitu ya remató, el Departamentu de Defensa norteamericanu dio anuncia de que la guerra-yos saliere más barata de lo que contaben: "namás" que 20.000 millones de dólares. Según les estimaciones de los militares les operaciones militares de la invasión costaron 10.000 millones de dólares, les municiones emplegaes unos 3.000 millones y los costos de personal algamaron los 7.000 millones de dólares. A esto hai que sumar los 2.000 millones de dólares mensuales que cuesta caltener les tropes d´Estaos Xuníos na zona del Golfu Pérsicu. De toles formes la cifra de 20.000 millones de dólares ta lloñe d´esi 1% del P.I.B. calculáu (100.000 millones de dólares). Seya'l preciu que seya, lo que canta ye que les consecuencies económiques van ser mui abultaes, ello ensin contar la inestabilidá política que va xenerar un fechu pergrave como ye'l nun respetu de la llegalidá internacional o les consecuencies.

Históricamente, dende la Guerra de Secesión y hasta agora, los EUA pagaron les sos guerres xubiendo nos impuestos, pero la intelixencia de Bush Junior quier dir más lloñe y plantega una perimportante baxada d´impuestos, ello énte'l un gastu esaxeráu que lleva la financiación de les sos aventures béliques como la d´Iraq. Ello ye que dellos economistes norteamericanos tan ablucaos con esti plantegamientu. Hai que recordar que l'intentu de nun xubir los impuestos nel períodu de preparación de la Guerra de Vietnam foi ún de los factores que fizo que la economía entamase una crisis inflacionista col aniciu de los 70. La llocura económica de George W. Bush yera pretendía facer un aforru fiscal de 726.000 millones de dólares en 11 años, pero la realidá ta imponiéndose y les particulares previsiones del illumináu presidente d´Estaos Xuníos tan menguando de forma mui abultada.

De xuro que'l Gobiernu Bush Junior va camín de crear otra vegada más un períodu de déficit públicu históricu asemeyáu al que se dio cuando'l presidente Ronald Reagan. Asina'l déficit fiscal que se calcula pal períodu 2004-2008 ta penriba el billón de dólares. Una política a la escontra de la que hai na Europa con un Bancu Central Européu (BCE) lluchando escontra la inflación y el déficit públicu. Ensin dulda'l coste de la guerra va desequilibrar el presupuestu de la primer economía del mundiu, col riesgu qu´ello supón pal restu de los países. Lo que nun se sabe ye cómo van pagase les factures de la Guerra d´Iraq. Anque Estaos Xuníos diz tener diseñáu un mini Plan Marshall pa Iraq, la realidá ye que les perres prometíes pa reconstruyir el caos d´Afganistán entovía nun lleguen. L´apueste de George W. Bush ye que cola Guerra ya rematada s´entame un procesu de recuperanza económica que compense la baxada d´impuestos con una xuba na recaudación. Pero la mala traza que presenta la macroecononomía mundial y los febles resultaos de les empreses nun van ayudar a los sos oxetivos.