“Lo importante d’estos 40 años ye que siguimos vivos, sumando xeneraciones a la reivindicación llingüística”, apunta Pulgar

El 26 de xineru del 1984 la Xunta pola Defensa de la Llingua Asturiana (XDLA) celebraba’l so primer aconceyamientu nel salón d’actos del Museú de Belles Artes d’Asturies. 40 años depués, el coleutivu qu’echó a andar cola “supervivencia del idioma” como oxetivu xeneral celebra que "l’asturianu sigue vivu na cai y qu'ente xeneraciones sigue pasándose l’interés pola llingua asturiana y pol so futuru".

“Foi un conceyu que fixeron nel Belles Artes xente que taba esmolecío pola situación del asturianu, que creía que debía d’haber una asociación que coordinara los esfuerzos y la reivindicación, que planificara un poco les reivindicaciones”, recuerda’l voceru de la organización Carlos Pulgar, que s’incorporara a la XDLA diez años depués d’aquella histórica fecha. “Unes cuantes persones que de manera individual empezaron a aconceyar, primero nel Belles Artes y llueu en llocales privaos, hasta que yá foi tomando cuerpu la Xunta”, continúa, “pero l’oxetivu primeru yera aunir les fuerces de persones que taben trabayando de manera más o menos individual en ciertos sectores, como’l musical o’l lliterariu, pa que fuera un reivindicación más unitaria”.

Cuatro décades de trabayu voluntariu y movilizaciones col oxetivu xeneral de “la supervivencia del idioma”. “Ye un tiempu nel que pasaron munches persones, caún con intereses diferentes, la música, la lliteratrura, la reivindicación, el folclor… Lo que fixo la Xunta foi un poco de catalizador d’esi tipu d’esperencies, pa que tol mundu pudiera participar de les coses que-y gustaben y a la vez tener l’oxetivu común de salvar l’idioma”, apunta.

“Lo importante d’estos 40 años ye que siguimos vivos, sumando xeneraciones a la reivindicación llingüística”, analiza Pulgar. “Ye de lo que se trata: que l’asturianu siga vivo na cai y qu'ente xeneraciones sigue pasándose l’interés pola llingua asturiana y pol so futuru”, añade’l voceru de la XDLA.

La importancia de la oficialidá

Pulgar afirma que, pa garantizar dichu futuru del idioma, la XDLA va reivindicar siempre “les ferramientes que sían necesaries en cada momentu, y va 40 años y agora la oficialidá ye la que se demuestra más útil en tolos sitios pa conservar una llingua. La oficialidá ye un pasu necesariu pa que sía posible esa supervivencia”.

Entrugáu sobre los planes del Gobiernu de reformar la Llei de Promoción y Usu del Bable/Asturianu, espón que “venimos d’un periodu complicáu nel que tema de la oficialidá tuvo mui presente na cai y nos medios, y depués d’un momentu tan intensu ye complicao analizar la situación actual. Evidentemente nosotros nun nos conformamos con esi escenariu nel que se diz qu’agora nun toca la oficialidá y que van modificar la Llei d’Usu, que ye una llei que consideramos yá dende hai munchos años agotada y que nun cumplió los oxetivos que dicíamos, enantes de poner les bases pa salvar l’idioma. Y l’oxetivu del movimientu de reivindicación tien que siguir siendo poner enriba’l debate sobre la oficialidá”.

“Sobre lo que vayan a facer o non, diremos opinando cuando se conozan cuestiones concretes, como siempre. Nunca renunciemos a qu’haya avances concretos, pero l’oxetivu siempre tien que ser el de los plenos derechos llingüísticos pa los asturianos y ensin eso ye mui difícil plantegase’l futuru del idioma y la so supervivencia”, espresa Pulgar, que considera la falta de 27 diputaos de “debate falsu: ‘porque nun hai 27 nun sé qué’. Los partíos que tán a favor de la oficialidá tienen que ponese a facer una reforma onde s’incluya la oficialidá y negociala, como faen col restu de les coses. Tolos años hai que negociar presupuestos y lleis y hai que negocialo colos demás hasta que se saca. El ‘como nun hai esto vamos a pañar lo otro’ nun ye un escenariu nel que vamos entrar nosotros”.

Actos conmemorativos previstos

El 2024 va ser un añu de celebración pa la XDLA, con actos previstos de conmemoración a nivel internu y tamién dalgunos esternos que dirán anunciando. Un aniversariu que llega nun momentu nel que, a nivel organizativu, “tamos bien”.

“Lo que nun acampaña tanto ye l’escenariu políticu. Venimos d’una época mui intensa, tolo que supunxo’l ‘Proyectu 2018’ hasta agora, un ciclu de movilizaciones mui ampliu y problamente de les más numberoses de la historia de la reivindicación, de les que más ilusión xeneraron, pero evidentemente col frenazu, el parón políticu qu’hai, nel que nun hai manera pa que se pongan manes a la obra pa poner una reforma del estatutu enriba la mesa, son tiempos más complicaos pa trabayalos. Pero bono, tamos cola esperanza y la seguridá de que vamos ser quien a movilizar nesti periodu complicáu”, espresa Pulgar 40 años depués del día nel qu'echó a andar una de les organizaciones claves pa entender la realidá asturiana d'estes décades.

Semeya de la Xunta pola Defensa de la Llingua Asturiana (XDLA).