Lluces y solombres nel futuru de les ayudes europees p’Asturies

Javier Valledor, Conseyeru d'Asuntos Europeos del Gobiernu asturianu, dio ayeri una rueda de prensa pa informar sobre la negociación d'ayudes comunitaries nun momentu en qu'Asturies enfréntase a la perda de la so condición de "rexón oxetivu 1" pol efectu estadísticu que vien de la entrada na UE de socios nuevos con rentes muncho más baxes que la nuestra.

Ello ye que tres del "non" a la constitución europea en Francia y n'Holanda la UE ta nun intre de paralís a tolos niveles, un impasse pal que la salida podría ser un alcuerdu a cualquier preciu en materia presupuestaria, dalgo que Valledor diz que podría dañar muncho los intereses d'Asturies y d'España. Asina, Valledor alcuéntrase nuna posición dificil, en cuantes que per una parte la priesa por pesllar los alcuerdos financieros como una manera de presentar resulytaos mientres el procesu constitucional sigue allancáu pue dar llugar a una solución mala, mientres que per otra'l Conseyeru asturianu reconoz abiertamente que ye preciso apurar la negociación enantes de que la presidencia de la UE pase a titularidá inglesa, cola que la negiociación diba ser, de xuro, muncho más difícil.

Pal conseyeru, l'alcuerdu ha cumplir trés condiciones, la más importante d'elles ye que se-yos dea un tratamiento específicu a les eurorrexones afectaes pol efectu estadísticu cola creación del "oxetivu 1 Bis". Una segunda condición, y qu'afecta gravemente a Asturies, ye que dientro d'esi "1 bis" nun se faigan dos grupos d'alcuerdu al volume de población que representen eses rexones dientro de los sos estaos respectivos, como poroponía la presidencia llusemburguesa, mientres que la tercer condición pasa per un esfuerzu económicu "adecuau" pa esti oxetivu 1bis, anque'l Conseyeru evitó dar cifres sobre cuanto sedría esi "adecuáu". De cualquier manera, Valledor entiende que la última propuesta que se presentó ye la meyor hasta'l momentu, apautando un periodu de transición 2007-2013 pa les rexones como Asturies y acutando un 0,41% del PIB a les ayudes a la cohexón contra'l 0,34% que se plantegaba de mano. El Conseyu d'Europa de la selmana qu'entra pue ser la clave pa pesllar el procesu negociador y definir el futuru a mediu plazu de les ayudes europees a Asturies.