Llingües de tol estáu adelántense a la redacción d'una futura Llei de Llingües

Por iniciativa del Gobiernu Catalán celebróse ayeri en Barcelona, na sé del Institut d'Estudis Catalans la primer Xornada Sobre la Regulación del usu de les Llingües nel Estáu, una convocatoria que, como esplicó'l Conseller Josep Bargalló, tien por oxetivu apautar ente toles partes interesaes una serie de puntos de vista de consensu sobre les midíes de protección y promoción que tendríen de dase dende'l Gobiernu español y sobre l'estatus llegal que tendría qu'abellugar y reconocer a toles llingües del estáu. La intención última de too ello ye la redacción d'una futura Llei de Llingües estatal que complemente les llexislaciones de cada CCAA ensin ser una estorbisa pa los marcos d'acción política de cada gobiernu autonómicu nin los d'actuación llingüística de les academies. La llei de llingües conviértese asina nuna posibilidá real que l'executivu de Zapatero, según esplicó Bargalló, ve como una "iniciativa positiva" anque ello nun quier dicir tampoco que seya un proyectu prioritariu.

Bargalló esplicó que va aconceyar cola vicepresidenta del Gobiernu, Teresa Fernández de la Vega en pasando'l procesu de los Presupuestos Xenerales del Estáu pa treslladá-y les conclusiones del alcuentru, que va tener más sesiones. Tolos gobiernos qu'aconceyaron ayeri en Barcelona concueyaron en qu'hai "insuficiencies llegales" sobre'l reconocimientu de les llingües del Estáu y en que l'artículu 3 de la Constitución ye "ambiguu" no tocante a la igualdá de les llingües.

La xornada dixebróse en dos meses de discutiniu distintes, la primera d'ámbitu académicu y la segunda de responsables de política llingüística nos sos respectivos territorios. D'esta manera, la mesa académica axuntó a representantes de les academies de la llingua vasca, gallega, asturiana y l'academia anfitriona, la Secció de Fololoxía del del Institut d'Estudis Catalans. D'otra manera, el Gobiernu asturianu nun tuvo presente na mesa d'ámbitu políticu, na que participaron representantes d'Aragón, Baleares, Cataluña, Euskadi y Galicia. Pela so parte, Valencia, la otra comunidá autónoma con llingua distinta del castellanu, nun participó de nenguna de les dos meses de trabayu.

El representante de l'Academia de la Llingua na xornada foi Roberto González - Quevedo. El secretariu de l'ALLA espresó a Asturies.com qu'esta foi una primer sesión de contactu na que l'ALLA espunxo la so visión sobre la situación d'Asturies, que, d'otra manera, los demás participantes yá conocíen mayormente, alcontrando la comprensión y la bona disposición de les demás instituciones participantes. González - Quevedo sorrayó'l calter abiertu de la convocatoria fecha pol Gobiernu catalán y espresó que'l fechu de qu'Asturies participe nesti marcu de debate contribuye enforma a poner a l'asturianu nel mapa de les llingües del estáu, a lo menos dende'l puntu de vista académicu, anque nun tenga'l calter de llingua oficial nel so territoriu. González - Quevedo tamién llamó l'atención sobre lo complicao de la xera y esplicó que, anque entovía nun hai fecha pa la segunda xunta, estes xornaes van tener más convocatories. Finalmente, el representante de l'Academia esclarió que con esti nuevu marcu de debate nun se trata de facer un "frente periféricu" contando los participantes cola collaboración y el diálogu cola Real Academia de la Lengua Española a nivel académicu y col executivu español a nivel políticu.