La llingua asturiana desapaez de los paneles informativos turísticos de Grau

|

Iniciativa pol Asturianu unvió una comunicación al alcalde de Grau, el popular Antonio Rey González, y a tolos grupos municipales tres conocer la desapaición del asturianu de los paneles informativos turísticos del conceyu. Dellos vecinos alerten de la postura que’l primer edil caltién pa col idioma.

Como bien amuesa una semeya difundida pola organización –pue vese al final d’esta información, como documentu axuntu–, los paneles turísticos informativos de los puntos más señalaos del conceyu, hasta la fecha billingües, anováronse recoyendo namái’l castellanu. “Esta entidá y los vecinos denunciantes nun son a entender que se faiga esta inversión pa dar pasos atrás nel yá probetayu usu que fai del asturianu’l Conceyu de Grau”, apunten dende Iniciativa pol Asturianu.

Cola intención de frenar esti retrocesu nel usu del idioma, l’asociación unvió una comunicación al alcalde y a tolos grupos municipales nel que solicita “que se vuelvan a instalar los cartelos cola versión billingüe asturianu y castellán” y polítiques de normalización nel municipiu. “El Conceyu de Grau nun usa l’asturianu nel so llabor habitual, nin na páxina web, nin na promoción del conceyu nin nes sos rellaciones colos ciudadanos”, asegura, calificando como fechu más grave la non utilización de la toponomia oficial, aprobada nel 2007.

Contador Estadistiques