llibru migracion

L'escritor Miguel Solís Santos presentó ayeri n'Avilés la obra "La memoria de les dos orielles, na aproximación a les xeneraciones
asturcubanes". Editáu por Trabe, ye esti un llibru qu'afonda afonda nel fenómenu del «americanu», términu popular n’Asturies pa referise a aquella xente que dexaba casa y tierra pa buscar fortuna na emigración. Pa ello l’autor sigue’l rastru documental d’una familia, los Maribona, asentaos xeneración tres xeneración, ente los sieglos XVI y XVIII, nel solar de Molleda, parroquia nes llendes de Corvera y Avilés. Emburriaos pola crisis que sigue a la caída del Antiguu Réxime, crucien l’Atlánticu nel sieglu XIX, centrándose'l llibru en ver en que foi a parar esa emigración y de qué manera va influir na sociedá asturiana d’a primeros del sieglu XX.

Asina, siguiendo les tesis del autor, anque l’americanismu naz del esfarrapamientu de les estructures sociales y económiques del vieyu réxime, la consecuencia más directa d’esti fenómenu p’Asturies foi la llegada de capital y l’entamu d’obres diverses qu’empobinaron el país p’hacia la modernidá: traíes d’agua, escueles, instalaciones eléctriques... bien d’elles fíes predilectes del «americanu» más fanegueru y activu del pueblu o de la villa, aquel que nun se conformó con vivir de rentes, si nón que quixo apuntase al carru del porvenir y del progresu económicu.

Miguel Solís Santos (Avilés, 1956) ye profesor, pintor, dibuxante y escritor. Foi ún de los primeros y más importantes narradores del Surdimientu, y a elli se-y debe la primer novela curtia d’esti movimientu de recuperación, Les llamuergues doraes (1982). Delles veces ganador de lo qu’agora ye’l premiu de novela «Xosefa de Xovellanos» con obres como Astor o un ensayu pa una nuea mitoloxía (1980) y L’oxetu la caridá (1981), la so novela más emblemática ye El trunfu prietu (1985). Ye l’autor del guión y los dibuxos de La hestoria d’Avilés, emblemáticu cómic publicáu en 1985.

"La memoria de les dos orielles" tien tamién un interesante prólogu a cargu de Luis Arias Argüelles-Meres. L'escritor y columnista del periódicu La Nueva España ye otru gran estudiosu y divulgador del fenómenu de los indianos,y tien espublizaos dellos llibros sobre l'asuntu, casu de la novela "último tren a Cuba" y "La Asturias que emigró a América" una obra na que se trataba d'aportar una visión nueva sobre la emigración asturiana lloñe de los tópicos que degradaben al indianu, un enfotu nel que concueya dafechu con Miguel Solís