Llibertá provisional con cargos pa los dos empresarios investigaos

La xuez del Xulgáu d'Instrucción númberu 4 de Xixón decretó esti xueves la llibertá provisional con cargos pal propietariu de la empresa Igrafo, Victor Manuel Muñiz, y d'Almacenes Pumarín, Alfonso Carlos Sánchez.

Dambos van tener la obligación de presentase nel xulgáu d'instrucción que lleva'l casu tolos vienres y caún cuenta con un plazu de cinco díes pa facer el pagu d'una fianza de 300.000 euros.
  
Los empresarios resultaron deteníos esti llunes nel marcu d'una investigación por supuestes irregularidaes n'axudicaciones. Los otros trés deteníos son l'ex conseyeru d'Educación y Ciencia, José Luis Iglesias Riopedre; la ex directora de Planificación, Centros ya Infraestructures del Principáu, María Jesús Otero; y la ex funcionaria del Principáu, Marta Renedo, que s'alcuentren na prisión asturiana de Villabona por orde de la maxistrada, a pidimientu del ministeriu fiscal polos delitos de sobornu, tráficu d'influencies, fraudes y exacciones fiscales y negociaciones prohibíes pa funcionarios.
  
La titular del Xulgáu, Ana López Pandiella, qu'instrúi'l casu, estudia inhibise a favor d'un xulgáu d'Uviéu al cometese los supuestos delitos na capital asturiana, colo que nun sería competente pa instruyir la causa. El pidimientu partió del lletráu Miguel Valdés, que representa a Víctor Manuel Muñiz, responsable d'Igrafo y ún de los empresarios imputaos.
  
Apoyu d’Areces a Riopedre
Tamién esti xueves, el presidente del Principáu, Vicente Álvarez Areces, y l'actual conseyeru d'Educación y Ciencia, Herminio Sastre, treslladaron el so ciñu a Riopedre apelando a la presunción d'inocencia a la espera de que la Xusticia esclare los fechos.