Llera Ramo presentó los resultaos del Estudiu Sociollingüísticu

El sociólogu y director del Euskobarómetro Francisco Llera Ramo abrió ayeri les Xornaes d'Estudiu de l'Academia de la Llingua. L'ausencia del filólogu alemán Bernhard Pöll obligó a adelantar la ponencia de llera Ramo, quien baxo'l títulu "lluces y solombres na normalización del asturianu" dio un repás interpretativu a los resultaos
de la II Encuesta Sociollingüíistica d'Asturies.

Llera Ramo definió'l periodu ente les dos encuestes (1991-2001) como un tiempu d'estancamientu nel qu'hubo pequeños avances pero que nun cuayaron nun apueste definitivu pola normalización, colo que d'ente los resultaos más importantes de la encuesta pue entesacase una perda xeneracional por falta de renovación de los falantes que pue poner nel plazu de dos xeneraciones al asturianu nuna situación de peligru de desapaición. Esta falta de renovación vien xunta otru datu preocupante, y ye que la llingua asturiana ta perdiendo protagonismu n'ámbetos en que foi tradicionalmente vehículu de comunicación, y ye que l'idioma ta reculando hasta nes conversaciones familiares. El sociólogu esplicó que los encuestaos tienen una percepción clara de perda del idioma

Anque l'usu mengua, l'informe de Llera Ramo reconoz que les actitúes y posicionamientos cásique nun cambien respective a 1991, rexitrándose un tantu por cientu mui altu de persones al favor de la oficialidá del idioma (60%) y, nel otru bandu, un porcentaxe mui pequeñu (19%) de contrarios a la normalización, que son la tercer parte de los que tan a favor. Sicasí, Llera Ramo reconoz qu'esti porcentaxe de contrarios nun ye identificable con nengún sector ideolóxicu, sinón que ye tresversal a tol espectru d'opciones polítiques, colo que "la so caricatura" ye más difícil en cuantes que gasten argumentaciones distintes. Otramiente, laencuesta espeya que la demanda del asturianu caltiense y que los encuestaos reclamen una mayor presencia del asturianu, sobremanera nos medios de comunicación