Llera Ramo presenta la III Encuesta Sociollingüística d’Asturies nes XXXVI Xornaes Internacionales d’Estudiu

|
Llera Ramo presenta la III Encuesta Sociollingüística d’Asturies nes XXXVI Xornaes Internacionales d’Estudiu

Esti martes van dar comienzu n’Uviéu les XXXVI Xornaes Internacionales d’Estudiu qu’entama l’Academia de la Llingua Asturiana (ALLA). Francisco José Llera Ramo va encargase de la ponencia inaugural, na que va presentar los datos de la III Encuesta Sociollingüística d’Asturies, de la que s'avanzaron aspeutos en xunu.

Esta actividá añal de l’ALLA va dar comienzu a les 12 hores cola intervención del vicerrector d’Investigación de la Universidá d’Uviéu,  José Ramón Obeso; el decanu de la Facultá de Filosofía y Lletres, sede de les xornaes, José Antonio Gómez Rodríguez; y el presidente de l’ALLA, Xosé Antón González Riaño. Darréu van presentase la edición dixital del númberu 117 de la revista ‘Lletres Asturianes’ y del númberu 7 de la revista ‘Ciencies. Cartafueyos Asturianos de Ciencia y Teunoloxía’, pa dar pasu después a la conferencia inaugural de Llera Ramo.

El direutor del Euskobarómetro y caderalgu de la Euskal Herriko Unibertsitatea (UPV/EHU)  va analizar los datos de la III Encuesta Sociollingüística, depués de qu’en xunu diera adelantu de dalgunos d’ellos. Nel avance destacóse qu’un 53 por cientu de los asturianos y asturianes apuesten pola oficialidá del idioma o qu’un 65 por cientu consideren que la fala vernácula d’asturies ye “l’asturianu, bable o llingua asturiana”, ente otres munches cuestiones.

Pela tarde, a les 16 hores, van siguir les intervenciones con Franck Floricic (Université Sorbonne Nouvelle, de París), que va poner la conferencia ‘La negación en asturiano: comparación  con otros idiomas románicos’, siguíes de les comunicaciones de Severino Antuña, Vicente Rodríguez Hevia, Pablo Suárez García, Carlos Alba ‘Cellero’ y Rosabel San Segundo. El primer día va finar cola ponencia ‘La epigrafía romana del dominiu llingüísticu ástur: una revisión’, de Juan José García González (Universidá d’Uviéu), con comienzu previstu pa les 18.45 hores.

Hasta’l xueves

Les XXXVI Xornaes Internacionales d’Estudiu van allargase hasta’l xueves nel salón d’actos del edificiu alministrativu de la Facultá de Filosofía y Lletres. Sonia Barnes (Marquette University, de Milwaukee) y Marcos Rodríguez Álvarez (Universidá d’Uviéu van protagonizar les dos ponencies del miércoles, mentes que Paquita Suárez Coalla (Borough of Manhattan Community College, de New York) y Marta Fernández Morales (Universidá d’Uviéu) van facer lo propio nel día caberu de l’actividá académica.

Mentes, van poner comunicaciones Florencio Friera, Antón Caamaño, Xosé Nel Comba, Xuan Xosé Lajo, Carmen Muñiz Cachón, Xulio Llaneza, Xurde Fernández, Lluis Antón González Fernández, Pablo A. Quiroga y Próspero Morán.

Contador Estadistiques