Llera empondera a Pumares por "dar esti pasu nel consensu constitucional pa salvar les nueses llingües"

Iniciativa rescampla que "tamos nun momentu mui importante pa la reivindicación del idioma y nun queremos que naide quede atrás".

El presidente del coleutivu, Iván Llera, nun tardó en "mostrar públicamente’l sofitu a Adrián Pumares y a Foro Asturies por esti esfuerciu pa negociar y trabayar na reforma estatutaria". El secretariu xeneral de la formación asturiana declaró esta tarde na segunda sesión del alderique d’orientación política xeneral correspondiente al añu llexislativu 2021-2022 la so intención de votar a favor de la reforma del Estatutu d'Autonomía y la oficialidá con delles condiciones que, nel casu del idioma, se centren na voluntariedá y non imposición, y na necesidá d'afitar nel testu la necesidá de contar con trés quintos de la Xunta Xeneral p'aprobar la llei que desendolque dicha oficialidá.

"Queremos reconocer la valentía de dar esti pasu nel consensu constitucional pa salvar les nueses llingües", añadió Llera, qu'apunta que "Foro Asturies vuelve a la postura orixinal de defensa del idioma que tuvo na so fundación y la mas coherente cola so ideoloxía". Asina, Iniciativa pol Asturianu ufre "la nuesa collaboración con Adrián Pumares y Foro pa trabayar y aprobar el nuevu Estautu d’Autonomía incluyendo la oficialidá del idioma”.