Lleguen a Asturies los primeros antivirales escontra l’andanciu

Son 254 melecines que yá tan nos hospitales d’Uviéu, Xixón y Avilés.

Asturies recibió güei los primeres 254 tratamientos de Paxlovid, de los 11.900 antivirales frente al covid que distribuyó'l Ministeriu de Sanidá a les comunidaes autónomes. Esta melecina, ta fecha dafechu pa parar la replicación del virus y empobinada a pacientes adultos cola enfermedá con riesgu de volvese grave.

La farmacia del Hospital Universitariu Central d'Asturies recibió 126 caxes, y 64 caún de los servicios de Cabueñes, en Xixón, y del San Agustín, n'Avilés. Son melecines que se van suministrar baxo mandatu médicu. Esti antiviral tómase per vía oral, lo que dexa facer un tratamientu ambulatoriu de los pacientes leves que tean en situación de riesgu frente al covid.

Va tener de suministrase lo antes posible tres del diagnósticu y dientro de los 5 díes posteriores al entamu de los síntomes. Paxlovid ta formáu polos fármacos ritonavir, que s'usa col VIH, y nirmatrelvilr. Nos ensayos clínicos amosó una eficacia del 89% na rebaxa del riesgu d’hospitalización o muerte en pacientes leves con una amenaza alta d'evolucionar a un covid grave. Y caltién la so actividá énte a variantes como la ómicron.

Esta nueva melecina yá la autorizara l'Axencia Europea del Medicamentu en xineru. El Ministeriu de Sanidá mercó dafechu 344.000 d'esti antiviral del Llaboratoriu Pfizer, de los que va repartir 50.000 demientres el primer trimestre del añu.