Llegaos a esti puntu, Lorient y Asturies

Dende l'añu 1981 un piñu d'asturianos lleven viaxando carretera p'arriba hasta Bretaña pa participar nel festival de cultura céltica más grande del mundu, el Festival Intercélticu de Lorient. Lo que pasa ye que dende'l 81 hasta güei cambiaron y meyoraron muncho les coses, y les y los asturianos que van per ellí yá nun tienen qu'andar desplicando con tanta insistencia ónde ta Asturies, qué pinta esa cruz na bandera, que nós tamién tenemos llingua propia y, sobre too, que tenemos una cultura musical que paga la pena que conozan. 

De la timidez de los primeros años, intentando ganar puntos pa qu'Asturies entrara a formar parte de la nómina de naciones celtes del festival, llegóse a que la cultura asturiana pasara a formar parte fundamental de la ufierta de Lorient. Dalgo que namás que se podía facer con constancia  y paciencia, seduciendo adulces añu tres añu a los responsables del festival, que nun lo dan fácil, pa llegar a que nel 98 el festival se dedique por primera vez a Asturies.

Nel 2003 el Festival de Lorient vuelve a dedicar la so edición a Asturies, colo que definitivamente los d'esta tierra pueden quitase los complexos, y dicir que, polo menos, hai un sitiu fuera de casa onde podemos ser Asturies, país y europeos dende les nuestres señes d'identida ensin pasar pela peñera de la "Marca España".

El pasu final yera tener mandu en plaza, dalgo que pasa a partir de 2007 cuando Lisardo Lombardía, quien dende'l 85 yera'l delegáu asturianu nel eventu, pasa a ser director del Festival Intercélticu de Lorient. Asturies y Bretaña queden venceyaes definitivamente, más incluso que cuando había conexón directa per mar ente Lorient y Xixón, afitando la rellación que dende va décades una riestra  de bretones y asturianos aporfíen en caltener.

Pasu ente pasu llegamos a 2013, edición na qu'Asturies ye otra vuelta protagonista. La delegación asturiana, agora dirixida pol músicu Iñaki Santianes, vuelve a mandar una caravana hacia'l norte de cultura musical asturiana que va pelear pa facese otra vuelta un espaciu ente les grandes estrelles de la música folk internacional que suelen tar presentes en Lorient. Nada que temer, munchos de los que viaxen nesa caravana son esperimentaos nes dinámiques festivaleres, colo que namás queda preocupase por pasalo bien y conocer, dos oxetivos fáciles d'algamar ellí.

Asturies.com va tar ellí pa, na midida de lo posible, tresmitiros l'actualidá, l'espíritu y les cares B del Festival Intercélticu de Lorient.