Llaviana presenta web oficial n’asturianu y anuncia la creación d’una Oficina de Política Llingüística

El Conceyu de Llaviana presentó ayeri la so páxina web oficial nueva. L'accesibilidá a les persones con discapacidá y la versión en llingua asturiana son les principales novedaes d'esta web diseñada por Héctor Álvarez Fernández, informáticu contratáu nel plan d'empléu local de Llaviana.

El vicealcalde llavianetu Adrián Barbón definió la páxina web como la rempuesta a una demanda de mayor y meyor información a la ciudadnía qu'existe realmente y como una ferramienta pa facer más cenciellos los trámites alministrativos. Pela so parte, el segundu teniente d'alcalde y conceyal de promoción del asturianu, José González sorrayó la prioridá que tien el gobiernu de Llaviana cola promoción de la llingua asturiana. El conceyal punxo la web como exemplu d'esti compromisu y anunció la creación d'una futura Oficina de Política Llingüística, anque ensin dar plazos pa la so entrada en funcionamientu.