Llaranes tien una necrópolis del sieglu XIII

Unes escavaciones feches a últimos del 2002 asoleyaron una necrópolis medieval en barriu de Llaranes, conceyu d'Avilés. Según les prebes del carbonu 14 que tan acabante de facese agora sobre'l material de los afayos, la necrópolis tien data aproximada nel sieglu XIII, un datu qu'afala al conceyu a encargar una segunda campaña d'escavaciones

La escavación fecha pola empresa L'Azagaya y dirixida pola arqueóloga Paula Bartolomé al sur de la Ilesia de San Llorienzu Cortina de Llaranes descubrió siete enterramientos, cinco en furacu y dos en caxes, siendo los más antiguos del sieglu XIII y el más modernu del XV. Estos datos comprobaos gracies a la preba del Carbonu 14 que se fizo en Barcelona sobre los restos demuestren que l'antigüedá del afayu ye superior a lo que se pensaba, en cuantes que les evidencies arqueolóxiques nel momentu de facer la escavación namás permitíen datar los enterramientos nel sieglu XVII

Con ser una necrópolis pequeña, la de Llaranes ye interesante enforma en cuantes que ye una de les que meyor van tar estudiaes, según diz l'arqueóloga, que destaca que ye raro que s'emplegue'l carbonu 14 pa yacimientos como esti, y tamién porque esiste una gran densidá d'enterramientos nun espaciu mui pequeñu, lo que fai camentar al equipu d'arqueólogos de L'Azagaya que'lllugar presentaba un poblamientu mui intensu na edá media.

Ello ye que son siete enterramientos nun espaciu d'unos ocho metros cuadraos, apaeciendo amás na escavación los restos del cimientu d'un edificiu anterior a l'actual ilesia de San Llorienzo Cortina. Los arqueólogos dicen qu'esisten referencies documentales al llugar al traviés de monedes d'época de los romanos que llevaron a entamar la escavación. La segunda fase de la escavación va facese tirando pa contra l'este porque pa contra'l sur la cata ta yá atiestando contra la carretera xeneral.