Llar Solidariu proyecta una película sobre los “Sem Terra” brasileños

El próximu vienres 4 de Febreru a les 20:00h, va proyectase la película-documental " Los sin Tierra - Por los caminos de América"

"Los sin Tierra -Por los caminos de América" ye una película documental qu'a lo llargo de 70 minutos espeya la historia del "Movimento dos Trabalhadores Rurais Sem Terra" (MST) del Brasil faciendo un repasu dende'l momentu fundacional del MST nel añu 1984, cuando 20 families ensin tierra ocuparon pacíficamente un llatifundiu improductivu, hasta anguaño, cuando yá son cerca de 4 millones los llabradores asentaes pol Movimientu; pasando tamién poles sos lluches y reivindicaciones más importantes a lo llargo d'estos más de venti años. Miguel Barros ye'l responsable d'esta cinta documental que va tener nel pase de mañana la so estrena n'Asturies y que tuvo nel pasáu Festival de Cine de Málaga'l premiu especial del públicu. L'actriz Cecilia Roth collaboró na realización del filme, poniendo la so voz na narración.

El Movimientu Ensin Tierra ye probablemente, la organización social más importante del mundu anguaño. Nacíu en medio de la dictadura militar nel Brasil, el MST axunta a los escluyíos de la sociedá brasileña del campu y de les ciudaes.

Según Naciones Uníes, el Brasil ye'l país del mundu que peor repartu tien de la sos riqueza y de la so tierra. El 50% de la tierra de llabor brasileño ta en manes del 1% de la población, creándose asina una masa de millones de families ensin tierra y ensin futuru qu'emigren hasta les ciudaes, onde los barrios de faveles son los únicos llugares que tienen p'atechase. El Movimientu de los Ensin Tierra propón una " reconquista" del campu del que los echaron y l'autoxestión del terrén recuperáu.

La proyección d'esti interesante documental entámala'l Comité de solidaridá con América Llatina (COSAL), y namás acabar el documental, va celebrase un debate con brigadistes asturianos nel Brasil ente los que va tar José Rábago, que vien d'una estancia de trés meses nel Brasil xunta'l MST. La campaña internacional pola Reforma Agraria va ser ún de los temes que centren el debate. La proyección entama mañana vienres 4 nel local del Llar Solidariu (Uviéu C/ Gascona númberu 12).