Llangréu y Xixón acueyen les movilizaciones pol Primeru Mayu

El martes, 1 de mayu, celébrase’l Día Internacional de los Trabayadores y Asturies va vivir, como ye vezu, una xornada de movilización. Los sindicatos mayoritarios van manifestase en Llangréu, mentes que CSI, SUATEA, CGT y CNT van facelo per Xixón.

Tres marchar l’añu pasáu per Avilés, la Unión Xeneral de Trabayadores (UXT) y Comisiones Obreres (CC OO) escueyen esti añu Llangréu pa celebrar el Primeru Mayu. Baxo’l lema ‘Tiempo de ganar’, los dos sindicatos mayoritarios tienen convocada una manifestación con salida al meudía del Parque Vieyu de La Felguera.

Dambes centrales esixen la derogación de la reforma llaboral que traxo, na so opinión, “desigualdá” y “precariedá”, avanzando sobre la posibilidá d’entamar una fuelga xeneral si nun hai progresos enantes del branu en cuanto a salarios, pensiones y siniestralidá llaboral. Tampoco nun escaecen la situación de la muyer, reivindicando “midíes concretes contra la fienda salarial”.

Media hora más tarde en Xixón van salir a la cai la Corriente Sindical d’Izquierda (CSI), el Sindicatu Unitariu Autónomu de los Trabayadores de la Enseñanza d’Asturies (SUATEA), la Confederación General del Trabajo (CGT) y la Confederación Nacional del Trabajo (CNT), cola novedá de que la salida va facese dende la Casa Sindical. D’esta manera estes organizaciones pretender protestar “escontra l'intentu de valtar l'edificiu, al empar que reivindicar la hestoria del movimientu obreru asturianu, la nuesa hestoria”.

El lema de la marcha d’esti añu ye ‘Escontra la precariedá ¡¡rebélate!!’, poniendo’l focu nel retrocesu “de manera alarmante nes condiciones llaborales y de vida de tola clase trabayadora” y destacando les movilizaciones feministes y poles pensiones. “Esti Primeru Mayu llamamos a tola clase trabayadora a que se rebele escontra la precariedá, escontra la esplotación y escontra un sistema fechu a la midía del empresariáu y pal que la clase trabayadora nun merecemos siquier la condición de seres humanos”, afalen los sindicatos convocantes.

Nesta movilización va repetise la convocatoria d'un bloque soberanista coordináu por #LluchandoPolaSoberanía. "P’acabar coles problemátiques que carecemos como clas trabayadora, precisamos de l’autoorganización, de la llucha, de tresformar la realidá del nuesu país. Nós tenémoslo claro: frayar la precariedá y abrir un camín nuevu pa la nuestra clase y pal nuestru pueblu", espresen.

Otra manera, la Unión Sindical Obrera (USO) desmárcase de los sindicatos mayoritarios, como yá asocedió l’añu pasáu, y entama’l so actu confederal en Lleón baxo’l lema ‘Los salarios, la deuda pendiente’. La salida ta prevista pa les 11.30 hores na plaza de la Delegación de la Junta de Castilla y Lleón.

Folixa solidaria

El Muséu del Pueblu d’Asturies va ser sede, un añu más, d’una folixa solidaria convocada por Para@s y Precari@s d’Asturies col sofitu de la CSI. Ésta va comenzar depués de la manifestación que’l sindicatu convoca en Xixón, con una xinta nel prau onde’l tendayu y apertura prevista del chigre pa les 14.30 hores.

A les 17 hores va haber xuegos tradicionales, a cargu de la Tertulia Cultural El Garrapiellu, un taller de pintura y pintacares con Asturies de Fieltru, y un conciertu coles actuaciones de Silvidos y Gemidos, y Extracto de Pollo en Lata.