Llangréu presenta una campaña pal usu del asturianu nel comerciu local

L'alcaldesa de Llangréu Mª Esther Díaz García participó esti vienres na presentación en Salón de Plenos del conceyu d'una campaña novedosa enforma que va afalar a los comerciantes al usu del asturianu: Pídilo n'asturianu, failo n'asturianu ye'l llema d'esta convocatoria que tien dos oxetivos, per una parte l'económicu de promocionar el pequeñu y medianu comerciu local, y per otra'l valor cultural de facelo al traviés de la llingua asturiana. La campaña, diseñada pol serviciu de promoción llingüística de Llangréu que Coordina Yolanda Montes cuenta col sofitu de la Oficina de Política Llingüística del Principáu d'Asturies y los conseyos personales na so ellaboración de Ramón d'Andrés. D'otra manera, l'Academia de la Llingua Asturiana, que tien soscritos convenios de collaboración col Conceyu de llangréu, tamién collabora con esta campaña. Les asociaciones de comerciantes de Llangréu ACOVIAN y ACOSA son la otra parte de la campaña y los encargaos de llevala a efectu al traviés de los sos asociaos.

El Director de la Oficina de Política Llingüística, Ramón d'Andrés asistió al actu que valió tamién pa presentar el programa d'actividaes del conceyu con motivu de la XXVI Selmana de les Lletres Asturianes.