Llangres yá tien el so primer discu, "Stura"

Va tiempu que diba ruxéndose que taba pa salir el primer discu de
Llangres, que finalmente salió esta selmana. Depués de participar
nel discu
"Xeneración
folk II", entamaron ser habituales peles nueches folk, que foi'l so
bancu de pruebes pa los cantares d'esti cd.

El grupu decidió probar la esperiencia de sacar el discu por si
mesmos, ensin nenguna discográfica, lo que fai que seya un discu mui
personal. Anque si contaron con munches collaboraciones, xente como Elías
García, Xosé Ambás, Marta Elola, Horacio García,
Fernando Malva, Manolo Durán, Fernardo Arias y Xel Pereda. Pero
especialmente importante ye la de Xuan Prado, padre d'unu de los miembros del
grupu, y qu'aportó la so esperiencia al proyectu d'estos músicos
llangreanos. La producción corrió de mano de Xel Pereda,
guitarrista de Llan de Cubel, y de los miembros de
Llangres.

El discu demuestra la gran calidá técnica de los sos
miembros, Borja Baragaño a la gaita y flauta o Yago Prado col arpa y
guitarra, nunos temes que munches vegaes recuerden al soníu de Llan de
Cubel, cantares rápidos y contundentes cola gaita como instrumentu predominate,
o les llamaes balaes celtes d'inspiración irlandesa, son la columna
vertebral del discu.

Un esperáu discu d'una banda qu'acaba de colar pa Italia de xira,
si te peta yá pues
mercar
esti cd n'Asturshop.