Llangréu denuncia a dos militantes de Darréu por un mural al favor de la oficialidá

La organización de mocedá Darréu, venceyada al partíu políticu Andecha Astur, denunció l'acusación por daños que punxo l'alcaldesa de Llangréu contra dos de los sos militantes énte la Fiscalía del Menor a cuenta de la realización d'un mural reivindicativu de la oficialidá del asturianu dientro d'una campaña que ta llevando alantre la organización baxo'l títulu "100 murales pola oficialidá".

Dende Darréu califiquen de "actuación represiva por motivaciones polítiques" la denuncia que-yos abulta "descomanada". Ello ye que dende l'añu 2004, el conceyu que preside la socialista Esther Díaz cuenta con una ordenanza que ta ente les más dures d'Asturies sobre llimpieza pública, condenándose específicamente na mesma la realización de pintaes y murales o les pegaes de cartelos y apautándose pa les mesmes multes d'ente 750 y 3.000 euros. Otros colectivos políticos y sociales yá denunciaron l'aplicación d'esta ordenanza dende qu'echó a andar y pola que'l conceyu llegó a multar a partíos políticos por asitiar propaganda electoral nos contenedores de basura del conceyu.