Llanera muestra la so música nun discu colectivu

L'esmolecimientu del músicu del conceyu Llanera Roberto
Junquera polos músicos y la música nel so conceyu, llevólu
a facer esti, "Llanera Suena", una esbilla de formaciones musicales
de Llanera d'estilos bien estremaos.



Al traviés d'esti proyectu quier amosase la bayura musical de la
que disfruta'l esti conceyu del centru d'Asturies, onde folk, coros, rock o
jazz mézclense nes cais del llar de los esconxuraos. Asina nel discu
participen seyes formaciones con dos cantares caúna. Asina topamos a
formaciones como la Coral Polifónica de Llanera, l'A.C.La Madreña
como banda gaites y coriquín de neños, el jazz de Ross Gala &
Rossaleda J.Q., el folk de
Guxán
de Lluz, onde toca'l propiu Roberto, los cantares y la gaita de Picu
Santufirme, y pa pesllar el discu rock de Desakato. Toles formaciones son del
conceyu Llanera, el diseñu del discu ye tamién llanerense Xavier
Molinos y foi grabáu, mezcláu y masterizáu nos
estudios Luna Music.



El discu pue mercase a un preciu simbólicu de 6 euros en
cualesquier de los quioscos del conceyu xuntu al periódicu local El
Tapín o de forma separada. L´aceptación que ta teniendo ente
la xente´l conceyu ye perbuena, ya qu'hasta'l momentu ya se vendieron les
500 copies de la primer edición, poro yá ta na cai una segunda
edición del mesmu. Pa llevar alantre esti proyectu
Roberto Junquera
nun recibió nengún tipu sofitu institucional. Y ello ye asina
depués de presenta-y el proyectu a los 78 Conceyos asturianos de los
que, quitando Xixón, nun recibió contestación. Con too y
con ello Roberto Junquera espara qu'esto seya l'aniciu d'una colección
de discos cola música d'Asturies al traviés de los sos conceyos.