Llan de Cubel viaxa otra vuelta a los Estaos Uníos

Non una, si non dos son les xires que van facer Llan de Cubel del otru llau del charcu, con too y con ello'l grupu yá ta rematando'l que va ser el so nuevu discu.

Inda queda por saber cuála ye la razón pa qu'esti grupu asturianu seya tan querío nel país de les hamburgueses, pero'l casu ye con estes dos xires de 2004 yá van ser siete les visites de Llan de Cubel a los Estaos Uníos. "Llan de Cubel" ye ún de los pocos grupos de música folk del estáu español que consigue entrar nos circuitos de Festivales d'EE.UU y Canadá. L'afición qu'hai pol grupu asturianu ente los amigos del folk nos Estaos Uníos fai que ca poco tengan qu'echar unos conciertos per aquelles tierres. Los propios miembros del grupu tan sorprendíos de la bona acoyida que tien per ellí, y rescamplen el calor del públicu como lo meyor d'un país nel los cubelos se sienten tan estraños como señaldosos del so llar.

La primera de les xires va ser nel mes de xunetu, dende'l dos hasta'l doce de xunetu, y la otra ta prevista pa setiembre. Nes dos xires el grupu pa tar en ciudaes como Dayton y Cleveland en Ohio, , Albany, Penfield y Hunter en Nueva York y Westport en Connecticut. A lo llargo del so viaxe van participar nos festivales más importantes de música folk de los Estaos Uníos como'l Cityfolk (Dayton), el Catskill Mountain Festival onde van compartir cartel coles "Cherish the Ladies", el City of Chicago Celtic Fest o el Lotus World Music Festival.

A los cubelos ta acumulándose-yos el trabayu, porque amás de facer estes dos xires tan en pleno procesu d'ellaboración del so sestu trabayu discográficu. Según comentó a Asturies.com el percusionista del grupu de Fonsu Mielgo, nestos momentos tan motando'l repertoriu que va tener esti nuevu discu, procesu que yá ta bastante avanzáu. Pa poder montar los amiestos a los que nos tien acostumaos "Llan de Cubel" ta llendo a les fontes coles que lleven trabayando tantos años, los cancioneros, los archivos de los grupos d'investigación etnográfica y les composiciones. El grupu lleva selecionaos más de 100 cantares, anque esta cifra de xuro que sedrá de mas del doble pa cuando acabe'l procesu d'esbilla, p'algamar la riestra final de cantares del cd. Dempués d'escuchar, y restaurar en munches ocasiones, les grabaciones, los miembros del grupu adapten los sones tradicionales al so estilu llegando al final al resultáu que yá pudimos escuchar por exemplu nel pasáu conciertu del grupu n'Ascensión d'Uviéu, onde "Llan de Cubel" yá tocó dos temes del nuevu repertoriu de la banda.

Agora los aficionaos al grupu namás tienen que ser un poco pacientes y esperar, porque'l grupu espera poder sacar el nuevu discu a la cai pa fin d'añu.