Llan de Cubel per tierres americanes

Dempués de que la burocracia americana torgare la primera xira americana que los "cubelos" teníen preparada pal mes de xunetu nos EE.UU, los asturianos vuelven a intentalo esti mes nuna xira de dos selmanes pela tierra de les hamburgueses.

Llan de Cubel yá lo teníen too preparao'l pasáu mes de xunetu pa facer una de les dos xires que teníen esti añu pelos EE.UU. Pero daquella'l grupu nun pudo nin montar nel avión. Ello foi que los visaos de trabayu nun llegaron a tiempu y por ello nun podíen entrar nel país, onde cada vegada ye más difícil entrar pola cantidá d'enzancos y controles que ponen les autoridaes americanes dende'l 11 setiembre pa consiguir los visaos. Como exemplu sirva qu'ente los tramites pelos que tuvieron de pasar los "cubelos" incluyíase una investigación a cargu del propiu FBI.

Tres del primer intentu fallíu, esta vegada paez que ta too en regla, FBI incluyíu, y que d'esta "Llan de Cubel" sí van facer la so sesta xira pelos EE.UU. Van ser dos selmanes dando conciertos pel mediu oeste americanu nos estaos de Wisconsin, Illinois, Tennessee y Ohio, siendo la cita más importante d'esta l'actuación nel City of Chicago Celtic Festival, ún de los referentes más importantes de la música celta nos EE.UU y onde van compartir escenariu con grupos como "Kila". El grupu tamién va actuar n'otros festivales como'l Cincinnati Celtic Music and Cultural Festival en Cincinnati (Ohio) o en Nashville, Tennessee.

Anque les autoridaes estaudinenses nun lo ponen na facil, "Llan de Cubel" nun quier dexar la oportunidá de facer estes xires, yá que'l grupu collechó un gran ésitu en toles visites que ficieron. Preba d'ello ye que yá se tan preparando otres dos xires pal añu qu'entra, FBI mediante.

Per otru llau la banda sigue trabayando nel so próximu discu, inda nun se puede falar de feches pero'l trabayu ye constante sobre fontes como grabaciones antigües d'asturianos nel exiliu, cancioneros de primeros de sieglu como'l de José Hurtado, amás de temes compuestos polos propios miembros del grupu.