Llamazares va facer cuatro alcuentros añales con ciudadanos pa informar de la so actividá

El diputáu por Asturies nel Congresu, Gaspar Llamazares, va entamar alcuentros públicos con ciudadanos pa informar sobre la so actividá na Cámara baxa. Izquierda Xunida busca asina dar un exemplu de “tresparencia democrática”.
 
Llamazares anunció güei esta decisión nuna rueda de prensa na que tuvo acompañáu del voceru de la coalición na Xunta Xeneral, Jesús Iglesias. El ex coordinador estatal d’Izquierda Xunida (IX) esplicó qu’estos alcuentros colos ciudadanos celebraránse al menos dos vegaes por periodu de sesiones –hai dos al añu– y, polo tanto, tendrán llugar "más o menos cada tres meses".
 
Xunto a esta midida, IX abre una “oficina parllamentaria" na so sede uviedina na que, "a parte de fixar reuniones y ruedes de prensa, fadráse pública l’axenda d’actividá parllamentaria del diputáu". Trátase, según Llamazares, d’un "exerciciu de tresparencia democrática".