Llamazares señala que nun va arrenunciar a la pensión del Congresu salvo alcuerdu del so grupu

Cayo Lara y Alberto Garzón, compañeros d’IX de Llamazares, anunciaron el martes la so decisión d’arrenunciar al plan de previsión social del Congresu. El diputáu por Asturies refugó siguir el mesmu camín salvo decisión "coleutiva" del so grupu.
 
"Normalmente yo nun faigo nada de manera individual", afirmó Gaspar Llamazares enantes d’aniciar los trámites pa formalizar la so acreditación como diputáu nel Congresu a entrugues de los periodistes sobre si tenía pensao siguir los mesmos pasos que los sos compañeros, eleutos por Madrid y Málaga. Nesi sen, apuntó qu’él nun va arrenunciar al plan de previsión social que la Cámara ufre a los diputaos si enantes nun hai una decisión "coleutiva" nel grupu d’Izquierda Xunida (IX) nel Congresu.
 
Foi’l martes cuando Lara y Garzón anunciaron la so intención de nun aceptar esi plan, qu’inclúi’l pagu d’una cantidá a les sos señoríes cuando se xubilen y del que se beneficien tamién el restu de trabayadores de la Cámara baxa al tratase d’una póliza coleutiva. El diputáu d’Iniciativa per Catalunya Verds (ICV), Joan Coscubiela, tamién arrenunció a esi plan.