Llamazares asegura que-y causa “sopresa la conversión" d’Álvarez-Cascos al rexonalismu

Gaspar Llamazares, candidatu d’IX al Congresu por Asturies, aseguró que-y causa “sorpresa la conversión” de Francisco Álvarez-Cascos al rexonalismu. Sicasí, señaló que’l presidente tien una “credibilidá escasa” pola so trayeutoria.
 
L’ex coordinador xeneral estatal d’Izquierda Xunida (IX) resaltó nuna entrevista a Europa Press qu’Álvarez-Cascos se benefició nes eleiciones de mayu de la crisis del sistema políticu n’Asturias y del PSOE, y que “recoyó votos de la derecha dividida y del populismu”. Llamazares dixo vivir con ilusión la cita coles urnes del 20 de payares y se muestra “convencíu” de que la so formación política va recuperar l’escañu d’Asturies, circunscripción onde hai en xuegu ocho.
 
El diputáu nesta llexislatura por Madrid señaló que los sos colegues por Asturies, tanto del PSOE (4) como del PP (4), tuvieron un “perfil baxu” nel Congresu y qu’apenes defendieron iniciatives interesantes p’Asturies. Una situación que Llamazares nun lo atribúi a la responsabilidá personal de los diputaos, sinón col sistema actual de “parllamentarismu de partíu”. Frente a esa idea, el políticu asturianu apuesta por un sistema nel que los diputaos sían fieles a la “llealtá al programa” enantes qu’a la “disciplina de grupu”.
 
La eleición de Trevín como candidatu
 
Llamazares, que señaló que nesta llexislatura va trabayar pola “refundación” de la izquierda, tamién faló del candidatu del PSOE por Asturies, Antonio Trevín. Pal políticu nacíu en Logroño la designación del delegáu del Gobiernu estatal n’Asturies como cabeza de llista supón que los socialistes “zarren files” nes posiciones más “conservadores”, anque de xemes en cuando pretenda facer un chisgu a la izquierda. “El PSOE xiró sobre si mesmu pa mantener la mesma posición que-y llevó a la derrota; dan la imaxe d’un partíu perdedor”, comentó.
 
Asina, considera que los socialistes asturianos tán treslladando a la sociedá’l mensaxe de que “nun tienen aspiraciones a gobernar”. Al mesmu tiempu, considera que ye la imaxe d’un partíu que “nun quiere cambiar”. Llamazares considera que’l PSOE que se presenta a estes eleiciones ye “el que nun quiere cambiar; el del pasáu; el de Felipe González y d’Alfredo Pérez Rubalcaba”.
 
Otra manera, entrugáu pola apaición d’Equo, formación ecoloxista de nueva creación que ta ganando apoyos dende’l sector políticu verde y nel que tán presentes los socios de coalición n’Asturies d’IX, Los Verdes d’Asturies, Llamazares señaló que’l so deséu fora que, de cara a les eleiciones, hubiera “una mayor capacidá d’entendimientu”, un frente “ampliu” de la izquierda. “Nun foi asina porque hai partíos que quieren vestise de llargo de nuevo na campaña; pero depués de les eleiciones creo que tenemos qu’esforzanos en trabayar xuntos”, comentó.