Llamada pa sofitar una iniciativa popular pal accesu de les comunidaes llingüístiques minorizaes a fondos europeos

Iniciativa pol Asturianu anima a roblar esta propuesta que yá supera'l millón de firmes.

Activa dende'l 7 de mayu del añu pasáu, esta Iniciativa Ciudadana Popular solicita que "la política de cohesión de la XE ha prestar atención especial a les rexones con carauterístiques nacionales, étniques, culturales, relixoses o llingüístiques que sían diferentes de les de les rexones de la so redolada". Asina, reclama que "el llabor de prevenir el retrasu económicu, caltener el desarrollu y preservar les condiciones pa la cohesión económica, social y territorial debe garantizar que se mantengan ensin alteración les sos carauterístiques propies".

Los firmantes consideren qu'estos territorios "han tener les mesmes oportunidaes d'accesu a los distintos fondos de la XE, y debe garantizase que se preserven les sos carauterístiques y el so afayadizu desarrollu económicu, de mou que se caltenga'l desarrollu de la XE y la so diversidá cultural". Un total de 1.052.092 de ciudadanos de la Xunión Europea (XE) mayores de 18 años nel momentu de la redaición d'esta noticia sofitaron la propuesta, superando'l millón necesario pa que llegue a la Comisión Europea, anque debe cumplir tamién que polo menos siete estaos miembros superen una cierta cifra según la so población.

De momento namái trespasaron esta llende Eslovaquia, Hungría y Rumanía, tando España a cuasi la metá del oxetivu con 19.054 firmes d'apoyu (47 por cientu). Hasta'l sábadu ye posible siguir sumando sofitos al traviés d'esti enllaz p'algamar les 40.500 necesaries.