Llaceria Rock toca en Lluanco "20 años depués"

El Livingston Café-Teatro acueye un únicu conciertu de la banda, activa hasta'l 2002, qu'asoleyó la maqueta ‘Yá tamos equí’.

El cantante Míguel Fernandi ‘Burilo’, el guitarrista Rafa Ávila, el baxista Pablo Rodríguez y el batería Wes Rodríguez, los cuatro integrantes que tuvieron mientres tola trayeutoria del grupu, van xuntase otra vuelta nun escenariu pa recordar los temes de Llaceria Rock y facer versiones que se sentíen nes sos actuaciones. Xunto a ellos tán convidaos otros componentes que pasaron pela formación.

D'esta forma, la banda celebra los venti años del so primer conciertu nes fiestes de Santana nel barriu altu de Lluanco, nel branu del 1999. El conciertu de realcuentru, baxo'l títulu '20 años depués', va celebrase esta medianueche nel Livingston, con entrada llibre.

Semeya obra de Victoria Fernández Camacho.