Lisardo Prieto y Ígor Medio y el tríu Tuenda actuen güei de nueche en Xixón

El salón d'actos del Antiguu Institutu de Xixón va acoyer güei miércoles 22 una sesión con dos grupos de folk. Lisardo Prieto y Ígor Medio per una llau, y el tríu Tuenda pol otru, va poner música d'Asturies y n'asturianu a esti día de febreru entrao en lluvia.

Esti conciertu va sirvir de presentación oficial del primer trabayu discográficu de Lisardo y Ígor como dúu, dambos músicos del grupu de folk xixonés Felpeyu. Ello ye que va poques selmanes que ta nes tiendes el so discu entitláu "Dual", que ye un representación fiel de los que saben facer los dos músicos en directo. Tamién con un discu espublizáu de recién vamos poder ver esta nueche al grupu Tuenda. El tríu formáu por Xosé Ambás cola voz, Elías García col bouzouky y Pepín de Muñalén cola xiblata ta siendo una de les revelaciones nel panorama folk. El so discu, repasu de la tradición musical y vocal asturiana dende la óptica de Tuenda, ta funcionando mui bien, y axúntase a l'apueste que tamién fai pola música con lletra Lisardo Prieto y Ígor Medio. El conciertu entama a les 20:00 hores y la entrada ye de baldre.