L'IRA Auténticu reclama l'autoría del atentáu de Derry

L’IRA Auténticu, una escisión del Exércitu Republicanu Irlandés (IRA), reclamó l'autoría del atentáu con coche bomba asocedíu la pasada madrugada na ciudá norirlandesa de Derry.

La esplosión del coche bomba, asitiáu cerca d'una oficina bancaria y d'un área comercial, y en frente d'un hotel, prodúxose poco dempués de la medianueche. Una hora antes recibiérase una alerta, polo que los axentes pudieron desagospiar les viviendes y negocios cercanos.
  
El vizprimer ministru principal d'Irlanda'l Norte y 'númberu dos' del Sinn Fein, Martin McGuinnes, calificó esti martes a los autores del atentáu de "neandertales" y alvirtió de que les actividaes de los grupos disidentes que nun firmaron los Acuerdos de Vienres Santu nun van facer escarrilar el procesu de paz.
  
McGuinness, que foi nel so día ún de los principales responsables del Exércitu Republicanu Irlandés (IRA), atópase participando na conferencia del Partíu Conservador, nesti momentu nel Gobiernu, en Birmingham.
  
"Los oxetivos d'estes persones son destruyir el procesu de paz, romper la unidá del executivu, dar marcha tras al reló de la política y avergoñar al Sinn Fein. Tuvieron fracasando miserablemente nestes cuatro cuestiones", señaló McGuinness en declaraciones a Sky TV, nes que describió a los autores del atentáu de "yonquis del conflictu" y de "neandertales".
  
Últimos pasos del conflictu
McGuinness yera una importante figura del IRA cuando'l grupu atentó con bomba contra la conferencia de los 'tories', en Brighton en 1984, sin llograr matar a la daquella primer ministra Margaret Thatcher, pero sí a otres cinco persones, ente elles un diputáu.
  
Dende l'acuerdu de paz en 1998 que punxo fin a 30 años de conflictu ente l'IRA, que buscaba una Irlanda unida, y los grupos protestantes pro-británicos, Irlanda'l Norte tuvo gozando d'una relativa calma, y munchos antiguos miembros de los grupos armaos, como McGuinness, entraron na política.
  
Pero nel últimu añu y mediu prodúxose un incrementu de los tiroteos y los atentaos con bomba per parte de grupos nacionalistes disidentes, que quieren poner fin al control británicu sobre l'Ulster.