L'Intercélticu d'Avilés presentóse oficialmente

La casa de cultura d'Avilés acoyó ayeri la presentación oficial del Festival Intercélticu d'Avilés d'anguaño, Asturies.com yá puede ufierta a los sos llectores el programa completu.

Los númberos canten, y ensin dubia esta ye la edición más ambiciosa del festival avilesín como se pudo comprobar ayeri . Más de quinientos cincuenta músicos, doscientos deportistes, desfiles cola participación de venti bandes de gaites, en resume, alredor de cien actos programaos pa desenvolvése ente los díes 16 y 26 de xunetu. Na presentación del Festival tantu'l presentador, Adolfo Camilo, como'l presidente de l'asociación "Esbardu" Juan Luís Casas, organizadora del festival, ficieron una defensa del calter d'Asturies como nación celta, amás de destacar esti eventu como un elementu dinamizador de la sector turísticu avilesín. L'actu-gala acabó cola actuación del grupu "Muyeres", primer actuación del Festival 2004.

Ayeri yá pudimos ver el programa completu del Festival, coles actuaciones principales de "Lúnasa", "Llan de Cubel", "Leilia", "N'Arba", "Tejedor", y la incorporación estelar d'última hora del espectáculu "Spirit of the Dance". Poner equí tol programa sedría interminable, poro ponemos a disposición de los nuesos llectores el programa completu en formatu pdf, la meyor forma de comprobar tolo que nos ufierta villa avilesina n'once díes de Festival Intercélticu.