L'Intercélticu d'Avilés presentóse oficialmente

Na mañana d'ayeri presentóse la novena edición
del Festival Intercélticu d'Avilés, qu'entama esti vienres 22, y
qu'a lo llargo de diez díes conviértese nel festival más
importante d'Asturies y de los más grandes d'España.



Na presentación nel Palaciu Valdecarzana d'Avilés tuvieron
presentes miembros de la organización del festival, asina como dalgunes
de les entidaes públiques y privaes que sofiten esta novena
edición del intercélticu avilesín. Asina, el conceyal de
cultura d'Avilés Juan José Fernández, declaró que
"la edición d'aguaño amplíase n'espacios y
conteníos, anque llamentamos nun poder trabayar colos conceyos de
Corvera y Castrillón por varios problemes de corte políticu y
económicu, anque allegrámonos de caltener la collaboración
col conceyu d'Illas", que tuvo presente de mano de l'alcaldesa Margarita
Fernández. El conceyal de cultura tamién quixo dar les gracies a
"tolos que sofiten esti festival especialmente a entidaes privaes como
Caxastur, o públiques como la conseyería de cultura, o l'Axencia
Asturiana de la Emigración".



Juan Luis Casas presidente de l'Asociación Esbardu, organizadora
del Festival, comentó "qu'esti ye un pasu más del festival
dempués del reblagu que dio l'añu pasáu cuando
recibió l'apoyu decidío de les instituciones públiques,
principalmente la conseyería de cultura y el Conceyu d'Avilés.
Ello ye que l'intercélticu non caltién les dimensiones del
añu pasáu, sinón que les aumenta llixeramente". De
los más de 124 actos Juan Luis Casas quixo rescamplar "la
Sestaferia, que va ser una Marcha Celta de los países participantes onde
van tar 22 formaciones ente bandes de gaites y grupos de baille, amás de
5 bloques teatrales de la mano de Teatro Margen". Esti desfile va llegar
hasta'l polideportivu del Quirinal onde va facese l'espectáculu
"Lluna Celta", que como esplicaba Casas, "de xuru que'l
públicu va quedar maraviyáu con esti espectáculu que
creemos que va convertise en referente. Ye un montaxe enorme cola
participación de más de 600 persones, música, lluz y
teatru". Dende la organización del festival tamién quixeron
rescamplar la nueche del sábadu 30 que va ser cuando actue'l gaiteru
gallegu Carlos
Núñez.



Pela so parte'l director xeneral de cultura del Principáu
d'Asturies Carlos Madera nomó a Avilés como capital celta, ya
que'l cartel "ye una pasada con casi 1.000 participantes y 134 actos, que
convierten a Avilés en capital celta a lo llargo d'esos diez
díes". Madera allegróse de dar el sofitu a esta iniciativa
porque "sigue la política d'especialización del
Principáu, Xixón Selmana Negra, Uviéu San Matéu y
Avilés Intercélticu, asina qu'apostamos por qu'esti festival se
convierta nel Intercélticu d'Asturies".



El director de la l'Axencia Asturiana de la Emigración Luis
Miguel Romero tamién quixo tar presente nesta presentación.
L'Axencia collabora trayendo al
festival trés grupos de fuera d'Asturies que viven la cultura asturiana
como si tuvieren en casa, ya que como dixo Luis Miguel Romero "la cultura
asturiana tamién se fai fuera d'Asturies y trayelos yera una
obligación". Asina nel festival van tar los grupos Folixa del
Centru Asturianu de Mendoza (Arxentina), Fardaxu del Centru Asturianu de Buenos
Aires y Risca l'Alba del Centru Asturianu de Barcelona.



L'Intercélticu d'Avilés echa andar esti vienres 22, y en cuantes que tola
riestra d'actividaes diba ser imposible resumila equí,
convidamos a los nuesos llectores a que consulten el
programa
completu del festival nesti enllace.