L’intercélticu d’Avilés pieslla’l cartel

El programa definitivu pa la edición d'anguaño del festival inclúi a Carlos Núñez, Felpeyu, La Bandina, los escocesos Canterach o los galesos Mabon.

L'intercélticu avilesín del 2005 yá ta pa echar a andar. Dende'l próximu vienres 22 hasta'l domingu 31 de xunetu, l'intercélticu d'Asturies va enllenar les cais de la Villa l'Adelantáu con un total de 800 músicos y más de 150 deportistes y actores que van participar nun programa qu'incluye un total de 124 actos distintos rellacionaos cola música y cultura tradicionales del arcu atlánticu.

Como siempre,la música ye'l ganchu d'esti festival, qu'ofrez delles nueches de folk del meyor nivel. Ente elles, rescampla la que va abrir el festival, que baxo l'epígrafe "la nueche los gaiteros" va aconceyar a veteranos de categoría como'l Gaiteru Veriña con grandes voces de la canción asturiana como ye'l casu de mariluz Cristobal Caunedo más les actuaciones de la bandina "Los ciquitrinos y el grupu de folk electrónicu Xera. Los gallegos Ávalon y los asturianos Felpeyu tan al cargu de la nueche del sábadu, mientres que'l grupu escocés Canterach va ser la estrella del domingu 24. La bandina'l Tombu y "La Bandina" van tocar el llunes y el martes, quedando pa los últimos díes del festival les últimes nueches de restallu, como la que van protagonizar el sábadu 30 los galesos Mabon, el gaiteru gallegu Carlos Núñez y el grupu folk d'emigrantes asturianos n'Arxentina Fardaxu.


El programa íntegru del festival yá ta disponible na so web oficial