L'intercélticu d'Avilés, meyor que nunca

Ayeri presentóse la octava edición del Festival Intercélticu d'Avilés. Con un cartel reforciáu respective a otros años, el festival avilesín presenta anguaño a Lúnasa y Llan de Cubel como grupos más importantes, anque tamién llama l'atención la celebración del espectáculu "Spirit of the dance" incorporación d'última hora a un cartel bien llambión

La 8 edición del festival intercélticu va desarrollase ente'l 16 y el 26 de xunetu, entamando con actuaciones de "DRD" el tríu de Diego Pangua Rubén Bada y Dolfo Rodríguez, ún de los grupos asturianos que van participar enfestival xunta otros como Tejedor (día 17) o La bandina'l Tombo. Los cántabros Cahorniga y el grupu Leilía van ser otros de los participantes nun festival que va acutar una nueche, la del día 23, pal grupu folk asturianu con más historia, Llan de Cubel, anque'l día 24 va ser la gran nueche del festival cola actuación de N'Arba, que van compartir escenariu con Lúnasa, la referencia indiscutible del folk irlandés y ún de los pocos grupos folk capaces d'esmucise nes llistes de superventes nos Estaos Uníos.

El festival pieslla'l día 26 cola representación de "Spirit of the Dance" un espectáculu de baille irlandés que mueve un gran númberu d'executantes y que remocica la música tradicional del Eire pa facer d'ello una atracción con entidá propio. "Spirit of the Dance" que se representa dende va años nos principales festivales folk del mundu, namás va tener esti añu 3 pases en territoriu español, lo que pue facer d'ellos otru de los grandes ganchos del intercélticu avilesín

Nos prósimos díes Asturies.com vamos dar más información sobre los conciertos y los grupos participantes nesti festival celta, que se perfila yá definitivamente como'll más importante del país