L'Intercélticu d'Avilés continua esti llunes

Los diez díes que dura esti festival nun dexen tiempu pal descansu. Güei llunes ye otra xornada de festival más qu'invita a visitar Avilés.

L'intercélticu avilesín ufiertanos actividaes ya dende pela mañana, principalmente al traviés de les distintes esposiciones que podemos visitar estos díes. El prerrománicu asturianu, amueses d'arte como "Galicia en suaños" o esposiciones etnográfiques enllenen unes mañanes culturales, a les que s'amiesten dende les 12 la mañana actuaciones de bandes de gaites y grupos de baille peles cais de la ciudá. Por exemplu güei dende les 12 la mañana vamos poder ver a los galeses Cwnmi Dawns Werin Caerdydd.

Ya pela tarde los conciertos, actividaes y talleres de baille multiplíquense per too Avilés. Nel parque del muelle va haber una preba de gastronomía gallega, a les 17:30 hores una taller de deportes tradicionales asturianos na Bolera de Llaranes y música na cai colos escoceses City of Newcastle Pipe Band a partir de les siete la tarde. A esa hora tamién asturianos, escoceses y irlandeses van amosar la so cultura musical na plaza Carlos Lobo a partir de 19:00 hores. Pela nueche va ser la hora de la música folk cola actuación del los asturianos La Bandina'l Tombo a les 23:15 hores na plaza Carlos Lobo. Mañana martes a esa mesma hora y nel mesmu llugar va ser el turnu del grupu qu'anda "de romandela", los tamién asturianos La Bandina. Pa conocer más más a fondu'l programa convidamos a consultar el programa del Intercélticu nesti enllace.