L'intentu de vetu de VOX al asturianu provoca una “fola d’indignación y solidaridá”

Los artistes qu’empleguen l’asturianu nun tardaron en reaicionar a les pallabres de la conceyala de VOX de Festexos en Xixón, Sara Concepción Álvarez Rouco, sobre la so intención de nun programalos, como amuesa’l manifiestu ‘Música n’asturianu sí’ que se ta moviendo nel sector. Asturies.com púnxose en contautu con dellos profesionales pa conocer la so opinión sobre esta discriminación llingüística.

“Ye un ataque gratuitu, ensin fundamentu nengún, que me paez parte de la so campaña publicitaria y de marketing”, espresa la cantante y panderetera Leticia Baselgas. “Intenta atacar a los más fondo d’una idea d’asturianiedá, de comunidá como la que tenemos equí, na que la llingua asturiana ye una parte importante d’ella, y van cincar onde piensen que pueden marcar más”, añade.

Xune Elipe, cantante de Dixebra, considera que “de la señora Rouco ye esperable esti tipu de pensamientu intolerante. Lo que más me llama l’atención ye que s’atreva a dicilo, a espresalo públicamente esin miramientu nengún, lo que ye significativo y preocupante de la situación sociopolítica que vivimos”.

“Llevo más de trés décades faciendo conciertos, cursos, talleres…, n’asturianu”, esplica pela so parte’l músicu David Varela, “y esto nun pue sali-yos de baldre”. “Lo que busquen ye facer esti tipu de ruíu, que ye beneficioso pa ellos de cara al so partíu. Al final impórta-yos un pimientu too”, añade l’integrante de La Bonturné o La Bandina, que diz que la so opinión coincide cola de la mayoría de los puntos del manifiestu ‘Música n’asturianu sí’.

Acompaña nel momentu de la llamada a Leticia Baselgas la so otra parte en L-R y n’otros tantos proyeutos, Rubén Bada, que nun dulda en dar el so puntu de vista. “Tán en campaña y, como nun tienen nada que dicir, ataquen a los símbolos, porque propuestes pa dirixir un país, una ciudá, nun tienen. Son xente que son incapaces de ver más allá que los sos propios miedos y les sos propies fobies”, espresa.

Del mundu del teatru contautamos con Carlos Alba, que prefier “nun perder el tiempu enrabietándome”. “Confío en que nun va ser asina porque tán ehí les lleis. Paezme imposible que se pueda facer una programación ensin artistes n’asturianu”, espresa al tiempu qu’amuesa la so allegría “pola denuncia d’Andecha Astur a la Fiscalía por delitu d’odiu de la conceyala. Nun se pue vetar a naide pol idioma que fale”.

El silenciu de Moriyón

El pautu de Foro en Xixón con VOX ye pa Elipe “la muerte política del partíu, que quería dar un perfil asturianista. Ye la so puntada final”. “Pumares salió l’otru día mui trescendente a desautorizar al so compañera de gobiernu en Xixón, pero él ye secretariu xeneral d’un partíu que pauta con otru qu’intenta vetar a artistes asturianos pola llingua qu’empleguen. Pero lo que nun tien nome ye’l silenciu de l’alcaldesa”, critica.

“Pienso que sí tendría que pronunciase y definir la so política y la so ideoloxía al respeuto”, apunta Baselgas, que recuerda qu’a Rouco “colocóla ella”. “Como responsable de tenelos ehí, debería de marcase y dicir si ta d’alcuerdu col ideariu d’esta xente o igual ye que tenía tantísima gana de garrase a la poltrona que fadría tratos col demoniu si fixera falta”, añade Alba.

Varela interpreta que “daquién superior a la conceyala de Festexos tien que salir a palestra a dar esplicaciones. Hai dalgo que dicir y tien que ser l’alcaldesa al ser la so socia de gobiernu”. Pela so parte, Alba considera “razonable” la esixencia d’esplicaciones énte la gravedá de les pallabres d’Álvarez Rouco.

Ruíu, trabayu y solidariá

Entrugaos sobre la postura qu’habría d’adoptar el coleutivu d’artistes, l’actor apunta que de facese’l vetu anunciáu “la reaición debería ser de manera creativa, tomando les cais con aiciones artístiques. Dir con too”.

“Básicame siguir trabayando. La meyor respuesta ye trabayar más tovía. Si yá trabayamos cuasi dafechu n’asturianu, agora básicamente siguir diendo pel mundu y falando n’asturianu pel mundu, qu’al final la xente entiéndolo como dalgo normal, non como esta xente que paez que nun entiende a mayor razón de ser qu’al odiu, la división y los rencores”, apunta Leticia Baselgas.

“Los derechos humanos nun ye dalgo que se discuta”, añade Bada, “los artistes deberíamos lluchar cola nuesa llibertá d’espresión, porque l’arte nun dexa de ser un mediu d’espresión, y cuando digo esto refiérome a artistes de tolos signos”, recordando al empar que “éstos tienen el cuayo de dicilo, pero de facto se vien faciendo que si tu nun yes un grupu que nun yes del gustu de según qué idearios, yá tas fuera, lo que me paez una llocura”.

Varela, que fai referencia otra vuelta a un manifiestu “que ta firmando xente de nivel internacional”, llistáu que va dase a conocer la selmana qu’entra, apunta dos opciones: “facer más ruíu qu’ellos y la solidaridá, el nun me sal de les narices tocar onde tais vosotros”. Nesi sen entiende que “caún tien la so política y filosofía de vida” y qu’entra en xuegu “el pan de muncha xente”, pero calca na importancia de la solidaridá nun tema tan sensible como ésti.

“Al traviés de les redes sociales prodúxose una respuesta rápida, importante y mayoritaria”, manifiesta Elipe, que tamién apuesta pola xunidá y el facer ruíu na cai. “Lo único positivo que tien too esto ye la fola d’indignación y solidaridá cola xente qu’usa l’asturianu y otres minoríes, como’l coleutivu LGTBI”, afirma’l cantante, que’l sábadu, nel conciertu por San Xuan de La España notó que “nel ambiente taba esti asuntu del vetu al asturianu, a aquellos según la so ideoloxía, y foi un momentu d’alcuentru”, poniendo d’exemplu l’instante nel que cantó xunto con Rodrigo Cuevas l’estribillu de ‘Canciu d’amor’ cuando baxó del escenariu a compartir col públicu.

Na semeya, el Teatru Xovellanos, que xestiona Divertia, empresa municipal que va controlar VOX depués del alcuerdu con Foro.