L'Institutu Asturianu de la Mocedá convoca una edición nueva del concursu de maquetes

Entámalu en comuña con 40 Principales Asturias y ta destináu a menores de 35 años.

Ta acabantes de convocase que trentena quinta edición del Concursu de Maquetes pa grupos Pop y Rock, que va dexar al grupu o solista ganador grabar un CD y participar en conciertos promocionales. Los trabayos han presentase, primero del 30 de payares, nel Rexistru Xeneral de la Conseyería de Presidencia.

El concursu ta dirixíu a xente mozo que tenga menos de 35 años a 31 d'avientu, que nacieren o tean allugaos nel país o sían descendientes d'emigrantes asturianos hasta segundu grau. Van almitise grupos o solistes que nun tengan vixente un contratu con una compañía discográfica y que nun editaren o autoeditaren, n’unu o dellos soportes, más de 12 temes.

Los participantes tampoco van poder presentar grabaciones baxo distintos nomes nin figurar individualmente en más d'un grupu. Asina mesmo, van quedar fuera del concursu los ganadores d'ediciones anteriores.

CD con un mínimu d'ocho cantares

El xuráu va escoyer un máximu d'ocho maquetes ente toles presentaes y va determinar el día, hora y llugar nel que tendrán d'actuar los grupos escoyíos. Les persones interesaes han enllenar un boletín d'inscripción y acompañalu d'una maqueta en CD, con un mínimu d'ocho cantares, grabada polos mesmos componentes inscritos.

Tamién han presentar el currículu del grupu, les lletres de los cantares y una fotografía. El modelu de solicitú ta disponible nes dependencies de la Conseyería de Presidencia y na sede electrónica del Gobiernu.

Pa llograla al traviés del rexistru en llinia activu na ficha de serviciu, tien d'introducise nel buscador de la cabecera del portal –nel marxe superior derechu– el códigu 2002197 y escoyer la forma de tramitación presencial. Tamién puede solicitase nes dependencies de 40 Principales Asturias, asitiana na uviedina cai Asturies númberu 19, y na rede d'Oficines Moces d'Asturies.

Dende la so primer edición, más de 800 grupos participaron nel concursu, editándose 58 discos, grabándose 44 videoclips y celebráronse decenes de conciertos colos grupos vencedores, amás d'hores de programación y promoción en 40 Principales Asturias y Cadena Dial.