L’IDEPA va tresformase na Axencia de Ciencia, Competitividá Empresarial y Innovación Asturiana

La Conseyería de Ciencia, Innovación y Universidá va xestionar la nueva Axencia de Ciencia, Competitividá Empresarial y Innovación Asturiana (Accia-Asturies) que vien a sustituyir al Institutu de Desarrollu Económicu del Principáu d'Asturies (IDEPA) “pa reordenar, coordinar y impulsar el sistema d'I+D+i”. El SERIDA tamién s’incorpora al departamentu de Borja Sánchez García.

La decisión de crear la nueva axencia a partir del IDEPA “respuende a criterios de racionalidá, al envís d'evitar duplicidades nel sector públicu y aprovechar los recursos colos que yá se cuenta pa construyir un nuevu modelu de gobernanza de la ciencia n'Asturies”, según espliquen dende’l Gobiernu. La conseyería va llevar a audiencia y información pública nos díes próximos l’anteproyeutu de llei que va regular l’organismu nuevu, pa depués pasar a aprobación por parte del Conseyu de Gobiernu y empecipiar la so tramitación na Xunta Xeneral, cola intención de que pueda echar a andar esti mesmu añu.

Accia-Asturies va encargase de xestionar mesmo los programes d'innovación que les polítiques d'investigación y toles actuaciones derivaes de la Estratexa d'Especialización Intelixente (S3) y el Plan de Ciencia, Tecnoloxía a Innovación (PCTI). Va ser, en resultes, l'órganu del Gobiernu que va xestionar toles ayudes y convocatories d'investigación y innovación.

Ente otres funciones rescamplen les mesmes del actual IDEPA rellacionaes col fomentu, tresformamientu, diversificación y internacionalización de la economía, al igual que l'impulsu a la cultura entamadora y al emprendimientu. A estes atribuciones añaden les rellacionaes cola xeneración y tresferencia de conocimientu, como convocatories, captación de talentu y toes aquelles venceyaes a la I+D+i.

L'anteproyeutu de llei recueye como novedá la creación de la figura de personal investigador distinguíu, que va poder ser contratáu pola axencia. Esti personal científicu va venir de persones beneficiaries de programes d'atracción y retención de talentu.

D’igual forma’l documentu nel que se ta trabayando dende Ciencia inclúi tamién l'adopción de midíes de reorganización y coordinación del ecosistema científicu-teunolóxicu incluyendo nesi nuevu modelu de gobernanza ámbitos como l’agroalimentariu, cola adscripción del SERIDA a la conseyería con competencies n'I+D+i, o la investigación biosanitaria. Nesti últimu puntu, regula la coordinación y cooperación cola Conseyería de Salú en materia de docencia, formación, investigación ya innovación sanitaria.

Amenorgamientu de burocracia

Sánchez García considera qu’Accia-Asturies asitia la I+D+i como gran aliáu de la industria y va ser un preséu decisivu pal futuru de la ciencia y la innovación n'Asturies, que va permitir “caminar hacia un modelu centralizáu que ponga los recursos disponibles na mesma dirección, la recuperación, crecimierntu y diversificación económica del Principáu d'Asturies”. Tamién amosó’l so convencimientu en qu’esti organismu nuevu va contribuyir a “entainar los procedimientos alministrativos, va amenorgar la burocracia y va facilitar la coordinación y establecimientu d'un calendariu de convocatories, tanto d'investigación como d'innovación”.

Na semeya, el conseyeru Sánchez García nuna xornada entamada en payares pola Asociación para el Progreso de la Dirección (APD) en collaboración col IDEPA.