Licítase la segunda autovía ente Uviéu y Xixón

El Conseyeru de Mediu Ambiente, Ordenación del Territoriu y Infraestructures, Francisco González Buendía, dio anuncia ayeri de que la obra de desdoblamientu de la carretera Uviéu-Xixón (AS-18) va llevala alantre la Unión Temporal d'Empreses Sacir-Itinere y Sanchez y Lago, ganadora nun concursu al que se presentaren cuatro ufiertes más. El concursu alxudica la obra d'enanche de la vía y tamién la contrata del caltenimientu de la mesma por un plazu de trenta años. La contratista comprométese tamién a desdoblar la AS-17 entre Llugones y Bobes (Siero) y llevantar una gasolinera.

Amás de ser una de les obres más importantes previstes pa la llexislatura, el desdoble de la AS-18 va presentar la novedá de que los sos 110 millones d'euros de coste, a los qu'hai qu'amestar el coste del caltenimientu y la espropiación de terrenos que se precisa, van financiase al traviés de la fórmula del "portalgu tapecíu" ello ye, l'executivu asturianu va pagar tolos años un canon de cerca de 8,5 millones d'euros, anque la cantidá va variar acordies col tráficu que rexistre la vía. La obra va entamar según les previsiones del executivu pa últimos d'agostu o primeros del mes de setiembre y tendría de tar acabada enantes de les elecciones del 2007. La vía tendría d'ayudar a desxonxestionar la estragada autopista "Y" pa la que de momentu nun se contempla la posibilidá d'amestá-y un tercer carril.