L'Ibex penriba los 8.000 puntos

Los mercaos internacionales meyoren nel entamu del mes de setiembre
gracies a la rebaxa de les tensiones nos precios del petroleu, y a la vuelta de
los inversores dempués del periodu estival. De toles maneres, la
comunidá inversora tien delles duldes y nun lo ven claro a la hora de
facer una fuerte apueste pola renta variable, mentanto'l Bancu Central
Européu decidió caltener los tipos na Zona Euru. L'entamu de
cursu pinta bien pa la Bolsa de Madrid, onde lloñe de les febles
sesiones d'esti veranu, l'Ibex superó la cota psicolóxica de los
8.000 puntos.



Esta foi una perimportante selmana d'estadístiques con datos
positivos pa la primer economía del mundiu. El datu más
representativu d'Estaos Xuníos foi'l que tiró p'arriba de les
bolses: el resultáu de la tasa de desempléu d'Agostu que foi
meyor del esperáu con un 5,4%. Los 144.000 nuevos puestos de trabayu pon
menos duldes nunos mercaos mui castigaos. Tamién nos Estaos
Xuníos animaron les bolses la estadística del ISM non factureru
d'Agostu, (índiz de confianza de xestores de compres), qu'algamó
los 58,2 puntos. Na Zona Euru diose a conocer les ventes al por menor que
tuvieron un resultáu del 0,4% mentanto que los economistes esperaben
datos mui negativos (-0,4%). Esti llunes ye'l Día del Trabayu nos Estaos
Xuníos polo que les bolses nun abrirán perdiendo les bolses
europees el mercáu de referencia.



El bon datu del paru meyoró los índices de les principales
bolses europees mentanto que les bolses norteamericanes tuvieron resultaos bien
probetayos. L'índiz Dow Jones xubió un 0,1% pero l'índiz
Nasdaq tuvo unes perdes al rodiu'l 0,5%. Nel Vieyu Continente la Bolsa de
Francfort foi una de les más beneficiaes de les xubes, con una xuba
penriba'l 1%. París, Llondres y Milán tuvieron un pieslle en
positivo.



L'índiz Ibex-35 tuvo una selmana de xubes hasta qu'al final
algamó los deseaos 8.000 puntos con una xuba nel conxuntu la selmana del
2,27%. Dende xunetu nun hebo nenguna selmana tan bona y los inversores tan
tornando al parqué madrilano. El volume de negociu algamó los
2.334 millones d'euros y los valores coles mayores xubes foron Amadeus,
Abertis, Santander, Sogecable y BBVA. Nel terrén de les perdes
destacó la tecnolóxica Indra. Ensin terminar la compra del Abbey,
el bancu de los Botín ya ta mercando la financiera portuguesa
Credibanco. Nel casu del Abbey National tovía ta por ver si los bancos
del Reinu Xuníu como l'HBOS o'l mesmu Lloyd's van planta-y cara al
Santander na puya. Pol momentu los que ya tan faciendo negociu son los bancos
d'inversión que tan asesorando al Santander, porque van cobrar 50
millones d'euros polos servicios prestaos.



Tensa tranquilidá nel mercáu del petroleu. Mentanto que
nel terrén iraquino ye cada vegada más difícil esportar
l'oru prieto, sigue la historia de la petrolera rusa Yukos con otru
capítulu: el Gobiernu rusu amplia l'embargu de les cuentes de les
filiales de la petrolera. El preciu del barril Brent asitióse nos 41,5
dólares. El casu ye que nesti mes de setiembre va notase sobremanera la
xuba del petroleu de los últimos meses. Los sectores del tresporte y de
la industria van ser los primeros en notar les tensiones inflacionistes
orixinaes pola xuba llibre del preciu del petroleu. Otramiente, permala selmana
del metal amariello que va viendo como los inversores abandonen el refugu del
oru pa invertir nes bolses. Asina, l'oru algamó una cotización de
403,40 dólares onza, la mayor cayida nes últimes tres selmanes.




Cayida del euru ante la fuercia que ta garrando'l dólar
estadounidense. Los bonos datos estadísticos del otru llau del
Atlánticu ta tirando p'arriba del dólar. La selmana pasada la
divisa europea asitióse nos 1,205 dólares unidá. Los
inversores tan recuperando la confianza na divisa norteamericana ante los
signos de recuperación económica nos Estaos Xuníos. Nel
mercáu de renta fixo los bonos tuvieron una selmana a la baxa. Como
exemplu'l bonu a diez años de referencia, el bund alemán, tuvo
una cayida abultada hasta algamar una rentabilidá del 4,145%.