L'Ibex, penriba de los 7.200 puntos

Los mercaos internacionales tuvieron una selmana de más a menos na que la tendencia a la baxa de Wall Street moderó les ganancies de les bolses europees. Dempués d´un períodu de cayíes nos tipos d´interés parez que les polítiques tornen y el Bancu de Inglaterra fizo la primer xuba de tipos hasta el 3,75%, la primer xuba dende ya hai tres años. N'España, l´Ibex caltién la tendencia alcista y mangose penriba los 7.200 puntos.



Anque Wall Street trancó a la baxa, la selmana pasada foi bona pa los datos macroeconómicos na primer potencia del mundu. La recuperanza del mercáu llaboral nos Estaos Xuníos, que rexistró una tasa de paru del 6,0% cuando les previsiones más optimistes contaben col 6,1%, mientres que l'inventariu de mayoristes medró un 0,4% y la media de ganacies por hora una décima. Toles estadístiques foron mui positives anque nun foron abondo pa que los inversores ficieren un apueste con fuercia a la hora de mercar acciones.

Les bolses europees trancaron la selmana pasada meyor que Wall Street, con xubes penriba´l 1% en Llondres, Francfort y París. El parqué madrilanu tamién tuvo xuba, pero más feble. El vienres pasáu foi un díi negativu pa Wall Street. L´índiz Dow Jones tuvo una cayida del 0,48% hasta los 9.809,73 puntos mentantu que´l tecnolóxicu Nasdaq tampoco aguantó y peslló en negativo con unes perdes del 0,28% hasta los 1.970,74 puntos.

Bona selmana na Bolsa de Madrid con una xuba del Ibex del 1,91%, pesllando'l vienres en 7.270,80 puntos. Una de les anuncies más importantes de la selmana foi la cayida del beneficiu de Repsol YPF penriba´l 8% anque la petrolera entretuvo l'atención sobre ella cola anuncia de la so nuevaestratexa empresarial. Baxu volume de negociu na bolsa madrilana como ya ye normal. El vienres nun se llegó a los 2.000 millones d´euros negociaos. Los valores con mayor ganancia foron Indra y Sogecable, penriba del 3%, y Zeltia, Arcelor, Endesa, BBVA, SCH, Inditex y ACS. Nel lláu de les perdes destacaron Red Eléctrica, Banco pular y Enagás. La biotecnolóxica gallega Zeltia sigue calentando'l valor con nueves anuncies del medicamentu estrella Yondelis. El Grupu Telefónica tuvo una selmana positiva anque ensin xubes bultables.

L'euru xubío más y quedó en1,15 dólares unidá. Anque la economía d´Europa nun meyora, la moneda comunitaria nun apara. Tamién el petroleu sigue xubiendo en cuantes que les reserves enerxétiques d´Estaos Xuníos mengüen. L´oru prieto cotízase a 28,86 dólares con perspectives de xubir entovía más a curtiu plazu. El metal preciosu oru tuvo una bona selmana con una xuba importante. L´oru yá val más de 385 dólares onza. Nel mercáu de renta fixo los bonos tuvieron una selmana de cayíes énte la meyora de la rentabilidá de la renta variable. Les bolses yá preparen el pieslle del añu, que según dellos analistes va ser bonu nos mercaos bursátiles. Na Bolsa de Madrid los brokers estimen que ye fácil que nel pieslle d´esti añu más del 80% de les empreses que coticen tengan ganancies. De fechu dempués d´algamar los 7.200 puntos nel selectivu Ibex, los inversores ya cuenten col asaltu a los 7.300.