L´Ibex, en másimos anuales

Selmana en positivo nes bolses mundiales anque´l pieslle del vienres foi a la baxa pol mieu a les altures de dellos inversores. Tercer selmana de xuba pal Ibex con un avance selmanal del 2% hasta los 6.857,20 puntos. El pieslle del vienres pasáu demostró'l mieu de dellos inversores a caltener posiciones, lo qu'emburrió una recoyida de beneficios nes bolses del Vieyu Continente, mentantu Wall Street trancó cayendo polos malos datos de la economía Norteamericana.



Ente les estadístiques más señeres de la selmana ta'l mal datu de confianza de la Universidá de Michigan, que marcó 87,2 puntos cuando'l mercáu contaba con 93'1. Los precios de producción y la balanza comercial de los EUA nun-yos dan munches esperances a los analistes, qu'apuesten por una recuperanza de la primer economía nel mundiu. Pero l´anuncia con más trescendencia de la selmana foi el recorte de la previsión del crecimientu del PIB na Zona Euru del Bancu Central Européu (BCE). El fechu ye que´l enfriamientu de la economía europea va xunta'l de l'Alemana. Énte esta anuncia los inversores ya esperen una nueva cayida nos tipos d´interés na prósima reunión del BCE pal mes de setiembre. Y nun ye solo un suañu de la comunidá inversora y de dellos analistes, sinon que´l propiu BCE tamién dio anuncia de que piensa na cayida de tipos. Nel otru lláu del Atlánticu tamién tan preparaos pa siguir baxando los tipos d´interés, yá que la Reserva Federal d´Estaos Xuníos ta esmolecía cola feble economía norteamericana, que ta mui lloñe del esaxeráu crecimientu económicu de la década de los 90. De fechu, dellos analistes apunten que pa la prósima reunión de la Reserva Federal a últimos de xunu podríen recortar los tipos hasta mediu puntu. Esti escenariu fizo que la selmana pasada la delda medrase abondo y xubiere'l preciu de los bonos.



L´Ibex pieslló'l vienres con una probetaya xuba del 0,12 puntos, mentantu les bolses europees trancaron en perda. De toles formes, el selectivu Ibex-35 asítiose asina nos 6.857,20 puntos, nuevu másimu del añu. París, Francfort y Llondres cayeron toes sobre'l 1%. Pieslle negativu en Wall Street col Dow Jones trancando a 9.117,1 puntos, mientres el tecnolóxicu Nasdaq mangose nos 1.626,5 puntos.



N'España, Inditex foi la estrella con una xuba del 5,61% pola anuncia d´un crecimientu penriba del que s'esperaba. El casu ye que cuando los analistes contaben con un crecimientu del beneficiu netu del 20% el datu final foi del 22,8%, ello ye, 82,1 millones d´euros que dexaron l'acción d'Inditex en 21,90 euros. Selmana de blincos pa Sogecable, valor de los más rentables del añu pero que cayó casi un 9% el xueves pasáu pa recuperar un 2,5% el vienres. BBVA y SCH tamién tuvieron una selmana positiva, al revés que'l xigante Telefónica, y yá nel lláu les perdes, Amadeus foi´l peor valor con una cayida del 2,5% al nun-yos prestar a los inversores l'incumplimientu de les perspectives de beneficiu de la compañía de reserves de viaxes. REE tamién tuvo perdes, con cayies penriba´l 2%, neto que Jazztel, que dio anuncia de que nel meyor de los casos nun va dar beneficiu hasta´l 2007. La burbuya d´Internet yá queda lloñe pero la quiebra técnica d´esta moza empresa avérase cada vegada más. Otramiente, hebo cambeos nos componentes del Ibex, del que salió PRISA pa dexa-y el sitiu a Corporación Mapfre. L´índiz xeneral de la Bolsa de Madrid asistiose en 716,27 puntos y l´índiz tecnolóxicu Nuevu Mercáu nos 1.853,6 puntos.

L'entamu del repartu del petróleu iraquino, que ta ta aselando'l mercáu del oru prieto, benefició a Cepsa y Repsol, que llevaron dos de los contratos multimillonarios que reparten los invasores norteamericanos y que marcaron una selmana de cayíes penriba del 2% pa dexar el preciu del barril Brent en 27,15 dólares. Otramiente, permala selmana pa les rentabilidaes de los bonos, que baxaron a esgaya, y ye que les rentabilidaes de los bonos español y francés a dos años nun lleguen nin al 1,8%, emburriando a los inversores a la renta variable. L´euru ya val 1,182 dólares, con posibilidá de xubir si aumenten les diferiencies de los tipos d´interés. Nos prósimos meses les bolses van siguir coles xubes si se confirmen los recortes nos tipos d´interés a dambes orielles del Atlánticu. Dende`l puntu de vista técnicu el mercáu bursátil español ta camudando de tendencia pa entamar un períodu de crecimientu y xuba nos valores. Preba d´ello ye´l xorrecimientu del volume de negociu d´esta selmana na Bolsa de Madrid.