L'Hostelcur Xixón protagoniza la entrevista de 'Alderiques d'Asturies'

|
L'Hostelcur Xixón protagoniza la entrevista de 'Alderiques d'Asturies'

El presidente Xuan Ramón Naves y la entrenadora María Fernández 'Pulgui' van tar nel programa que s'emite en MuyMuy Televisión los sábados a les 19 hores al traviés del TDT y Telecable.

L'equipu de ḥoquei patinos femenín del Club Patín Gijón Solimar, Hostelcur por motivos de patrociniu, ye'l que cuenta col mayor palmarés d'Asturies al sumar 4 Copes d'Europa, 3 Copes y 1 OK Lliga. Esta temporada, recién terminada, el club xixonés llegó a semifinales de Copa d'Europa, finó terceru en Lliga y algamó la Copa de la Reina, una trayeutoria digna de mención.

Por esti motivu, 'Alderiques d'Asturies' quier dedicar el programa d'esti sábadu al Hostelcur Xixón, con una entrevista al presidente y a la entrenadora pa falar del club y d'esti deporte con tantu raigañu nel país. Como ye vezu nel formatu d'entrevistes, el presentador Samuel Gradín va tar acompañáu polos periodistes Pablo R. Guardado, redautor d'Asturies.com, y Inaciu Galán.

'Alderiques d'Asturies' dio'l saltu recién a la televisión al traviés del canal MuyMuy Televisión, que s'emite na plataforma de cable Telecable y que tien cobertoria per TDT nos conceyos de Gozón, Carreño, Xixón, Villaviciosa y Colunga.

Contador Estadistiques